Lucas 17:11-25

¹¹Janua betsatian Jesús Jerusalénkidi kakunkaini Samaria mai pakea inun Galilea mai pakea ja dabe namakis anu kai

¹²mae betsa anu jikiaya 10 junibu yudaki chaminibun Jesús bechitan benanta mapuxun

¹³jancha kushipawen yuikin: —Jesús yusinaan, nukuwen nuiwe— akabu

¹⁴Jesús jatuwen nuikin uinkin jatu yunukin: —Jerusalén anu buxun Diosbe nukunabu janchaxunikabu matun yuda uinmaditankanwen— jatu wa jawen jancha ikunwanbaini dabekebaini bukin jatun yudaki chamini ma xuxa ana chami jayama uiainbun

¹⁵jabu bestichaitun jawen yudaki chamini ma xuxa uintan dabekekidan jui kushipawen Dios kenwain

¹⁶Jesúsunabuma Samarianawabia Jesúsun besuudi danti iki beti ixun kenwanyan

¹⁷Jesúsun yuikin: —10 juni chaminibu en xuxawaxuki. ¿Chanimamen? ¿Janimen, ja 9 juni Israelbudan?— ikin

¹⁸—Na nawan besti Dios kenwain chintunkidanxuki. Jawen tapinkanwen— iwanan,

¹⁹nawa danti ika yuikin: —Benitan inun kadiwe. Min ea ikunwainwen taea min xuxaxuki— anikiaki.

²⁰Januxun fariseobun Dios xanen ibui ana juxanaikidi yukabu Jesúsun jatu yuikin: —Dios xanen ibuaidan, ikis beduwen man uintidumaki.

²¹Ja inun, tsuanda yuikin: “Uinwen. Dios xanen ibui naki”, ikasmai: “Uinwen. Unuki”, ikin yuiama ixankanikiki. Chanima en matu yuiaii. Dios xanen ibuidan, ikis matube dasia niaki, taeidan— jatu watan

²²januxun jawen tsumabu beiskin yuikin: —Eadan, matun Juchi Kayabi Iyua ea uinbianixun ana ea uinkatsis ibiakin man yane ana ea uianma ixankanaii.

²³Man jaskaya matu padankin yuikin: “Nenu ma juaki, Cristodan”, ikasmai, “Unu ma juaki”, ikaibu ninkabiatan jadi jatu chibanyamaxankanwen.

²⁴Jakia en matun Juchi Kayabi Iyua en ana eskakidanxanai matu yuinun ninkakanwen. Jawaida uke bukun kana bedi iki bakamis keskatan en ana juai dasibibun ea uinxankanikiki.

²⁵En jaskadiama ja dukun na jabiatian ea danankin yudabun bikajaida ea tenemakin ea nuitapawayuxankanikiki.