LUKA 17:11-25

¹¹Yesu viyakalile yochola Yelusalemu, kabitila muimbaka ya isi za Samalia na Galilaya.

¹²Viyakalile yokwingila muna ikiwambo kimwe, wanhu longo dimwe wolumwa dikulu wamwizila, wema kutalitali,

¹³wenula dizwi wolonga, “Mndewa, Yesu, utonele bazi!”

¹⁴Yesu viyawawene kawalongela, “Gendeni ha iwakulu wa nhambiko wakawalole goya.” Viwakalile wochola mnzila wahona.

¹⁵Munhu imwe mmwanza wao viyonile kahona, kabwela, kenula dizwi yomuyenzi Mulungu.

¹⁶Kamfugamila mavindi Yesu na kumgwaa hewela. Na munhu ija kakala Msamalia.

¹⁷Ila Yesu kauza, “Hawakalile wanhu longo dimwe wahonyigwe? Wakwahi wayagwe tisa?

¹⁸Haduhu hata munhu imwe yabwelile kumuheweza Mulungu ila muhenza ino yeiyeka?”

¹⁹Yesu kamulongela, “Ima wima uchole, nhamanila yako ikuhonya.”

²⁰Mafalisayo wayagwe wamuuza Yesu, wolonga, “Zua dilihi Undewa wa Mulungu vondawize?” Heyo kawalongela, “Undewa wa Mulungu hawiza mkoneka na meso.

²¹Haduhu munhu yondayalonge, ‘Loleni wa hano!’ Ama ‘Wa haja!’ Kwavija Undewa wa Mulungu wa mmwenu.”

²²Abaho, kawalongela wanahina zake, “Kipigiti chokwiza vondamusulukile kona zua dondanibwele, nie, Mwana wa Munhu, ila hamujona.

²³Na wanhu wowalongela, ‘Loleni kahaja!’ ama, ‘Loleni kahano!’ Ila sambimuwakweleleze.

²⁴Kamba vija lumwemwe vulumweka kulawa kuulanga na kumwemwesa kulawa ng'ambu ino mbaka ng'ambu ija, avo vivo vondaiwe mdizua dondanize, nie, Mwana wa Munhu.

²⁵Ila tanhu nolondigwa nigaye ng'hani na kulemigwa na wanhu wa mulelo uno.