Luk 17:11-25

¹¹Yesu eyi kəkɔ Yerusalɛm, kɔ Yesu ɛyɛfɛ kəcali atɔf ŋa Samari kɔ ŋa Kalile dacɔ mɔ.

¹²Eyi kəbɛrɛ tadare tɔlɔma, kɔ afum wəco aka sen alɔma ŋander ŋafaynɛ kɔ; kɔ ŋaŋcəmɛ pəbɔlɛ.

¹³Kɔ ŋampɛnɛ sim ŋac-loku: «Yesu, Wəkiriŋ, məyɔnɛ su nɔnɔfɔr!»

¹⁴Ntɛ Yesu ɛnəŋk ŋa mɔ, k’oloku ŋa: «Nəkɔ nəmentərnɛ aloŋnɛ nde kəlɔ kəpɔŋ ka Kanu.» Afum aŋɛ ŋayi kəkɔ, kɔ pəyɔnɛ fɔ ŋasɔk a kɔ ŋandebɛrɛ di.

¹⁵Ntɛ wəkin ɛnəŋk fɔ ɛntamnɛ mɔ, k’oluksərnɛ pəc-cam debeki da Kanu dim dɔpɔŋ.

¹⁶K’ɛfəntərɛ dəntɔf, k’osumpər Yesu wɛcək, k’eyek-yekəs kɔ. Fum wəkakɔ, wəSamari ɛnayi.

¹⁷Kɔ Yesu eyif kɔ: «Bafɔ asɔkəs afum aŋɛ wəco? Deke aləpəs aŋɛ camət-maŋkəlɛ ŋayi-ɛ?

¹⁸Ali wəkin ɛŋcɛm-cɛmnɛ fɛ kəluksərnɛ pədecam debeki da Kanu, mɛnɛ wəcikəra wəkin wəkawɛ?»

¹⁹Kɔ Yesu oloku kɔ: «Məyɛfɛ məkɔ, kəlaŋ kam kəyac’əm.»

²⁰Ntɛ aFarisi ŋayif Yesu tɛm ntɛ dɛbɛ da Kanu dendeder mɔ, k’oloku ŋa: «Dɛbɛ da Kanu dɔfɔder pagbətnɛ di fəp.

²¹Afɔkulɛ di, ‹Idɛndɛ nnɔ!›, ‹Idɔkɔ nde!› Bawo dɛbɛ da Kanu nəna ŋɔ deyi dacɔ.»

²²Ntɛ Yesu elip kəloku ŋa ti mɔ, k’oloku acɛpsɛ ɔn darəŋ: «Dɔsɔk dendebəp ndɛ nəndefaŋ kənəŋk dɔsɔk din da Wan ka fum mɔ, mba nəfɔsɔ-nəŋk di.

²³Andelok’un: ‹Eyi nnɔ!› kɔ pəyɔnɛ fɛ ti-ɛ ‹Eyi nde!› Ta nədekɔ di, ta nədeyɛksərnɛ kəkɔ ka di.

²⁴Pəmɔ tɔkɔ pəmot poŋmot a pəyɔ waŋkəra dareŋc kəyɛfɛ kəsək kin haŋ ka mɛrəŋ mɔ, tatɔkɔ tɔ Wan ka fum endeyi kɔ dɔsɔk dɔn.

²⁵Mba mɛnɛ pətɔrɔ pəpɔŋ kərɛs, afum a tɛm tantɛ ŋawɛnəs kɔ.