SAN LUCAS 17:11-25

¹¹Ra ze Jesús Jerusalén udi'di galahui Samaria ne Galilea.

¹²Ra yendá be ti guidxi huiini biree chii hombre napa lepra, bizuhuaa ca zitu

¹³ne bicaa ca ridxi laabe: ―Jesús, Maistru, biá laadu.

¹⁴Ora bi'ya be laaca rabi be laaca': ―Laché ra nuu sacerdote. Lachiuluí' laa ma bianda tu. Ne laga ze ca neza nisi pe byui' lepra que ladi ca'.

¹⁵Ora bi'ya tobi de laaca ma bianda, bigueta uxooñe', cucaa ridxi, cusisaca Dios.

¹⁶Bizuxibi xa ñee be dede gudixhe ique layú, cudii diuxquixe. Ngue nda samaritanu laa.

¹⁷Oraque na be: ―Ñee cadi chii cabe bianda la? Laga xca' que ya', uná laaca'.

¹⁸Ñee iruti ru qué nibigueta nusisaca Dios sínuque laga ni cadi binni laanu ri la?

¹⁹Ne óraque rabi be hombre que: ―Biasa, uyé. Bianda lu purti bini cre lu'.

²⁰Oraque unaba diidxa ca fariseu laabe padxí uzulú guni mandar Dios. Para rabi be laaca': ―Dxi uzulú guni mandar Dios nga cadi ni ihuinni,

²¹ne iruti qué zanda gabi laatu, “Rarí cayaca ni”, o “Rarica'”; purti ma cayuni mandar Dios lade tu.

²²Oraque rabi be ca discípulu stibe: ―Zadxiña dxi zacala'dxi tu gu'ya tu Hombre Biseenda Dios, neca ti dxi si, peru qué zuuya tu.

²³Ziuu tu gabi laatu: “Rarí nuu be”, o “Rarica nuu be”, peru qué chi nanda tu.

²⁴Purti casi riuu xpiaani rayu de ti ladu para sti ladu, zacaca zaca ni dxi gueeda be sti tiru.

²⁵Peru nirudó' naquiiñe acaná be ne udxii deche ca binni nuu yanna ri laabe.