SAN LUCAS 17:11-25

¹¹Cuahn che cuahn Dihvo vo ya̱n Jerusalén ne, chuh ye na̱n che rivah esta̱do yahn Galilea nduco nación yahn Samaria.

¹²Ura che a nda̱ nino ye a̱ma ya̱n lihn ne, nda̱ ndiche sa̱hn che ndi se cah che recha̱ yute.

¹³Cah se: ―Dihve nuhn, Jesús, ¡conan va̱hino ne nuhn!

¹⁴Cuahn che ndihchero ye sa̱hn chahn ne, ra̱hn ye ri ye sa̱hn: ―Cuahn nchuhn na̱n chidocuya̱n. Dinahn sa̱hn chahn, ne nahmin che cuahn se ne, ndoyahn nducoya̱ca se.

¹⁵Tuhme a̱ma se ne, cade ndihchero se che a ndoyahn se ne, ndaconan se, ne a̱ma rendeva se yavena̱n Dendiohs.

¹⁶Chehntihya se numacuahn vedenecun na̱n Dihvo vo, ne neca̱h se nundihve cuahn ihyan. Sa̱hn min ne, sa̱hn ta̱ma nación se. Samaria nación yahn se.

¹⁷Tuhme tumerune Dihvo vo: ―¿A ndiyu ri ndiche sa̱hn chahn che ndoyahn se? ¿Tiya sa̱hn che nun chahn?

¹⁸¿A dema̱n sa̱hn ta̱ma nación cuh che ndaconan se, ndeva se yavena̱n Dendiohs?

¹⁹Chihno min ne, ra̱hn ye ri ye sa̱hn: ―Dehve rahque. Cuenecuen. Conahn, te nducote chitehne ne, a ndoyehn.

²⁰Tumerune sa̱hn fariseo Dihvo vo ticua̱hn cuana̱n vederihquentiyon yahn Dendiohs, ne ndahconan ye yahn se: ―Vederihquentiyon yahn Dendiohs ne, hua cuana̱n nduhca̱ che chenan rino nchuhn.

²¹Nde a̱ma ihyan hua co ye nchuhn: “Muhn va”, o “min va”, te Dendiohs ne, a nda̱hco ca̱de ye vederihquentiyon yahn ye va̱n nchuhn.

²²Ra̱hn Dihvo vo ri ye ihyan apóstol yahn ye: ―U che rinducó nducoya̱ca ihyan ne, nda̱ ro che a̱ma nahn nchuhn che ndaconán, ate hua nda̱ca ndihchero ne u.

²³Ndere ca̱hma ihyan co ye nchuhn: “Nga̱ ihyan che a va ca̱de che chi ye, ndedevahn ye ihyan iyehnse, quenun ye muhn”, o “nga̱ ye, quenan ye min.” Hua tumeca̱h nchuhn, nde hua ca̱hn ne, ndihchero ne.

²⁴Chemin che rí nchuhn te nduhca̱ che rendihchero ihyan che riya cuah, ri ro dave numachahte ne, tihca̱ ndihchero ihyan u che rinducó nducoya̱ca ihyan, ro che ndá̱.

²⁵Ate dinoca va che a̱ma chuhríhn, te ihyan che vate ye ma̱n ro cuh ne, hua co ndihche ye u.