ᤗᤢᤁᤠ 17:11-25

¹¹ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤖᤢᤛᤗᤧᤶᤔᤥ ᤐᤣᤖ ᤐᤳᤇᤧᤸᤗᤧ ᤃᤠᤗᤡᤗ ᤏᤢ ᤛᤠᤔᤖᤡᤕᤠᤖᤧ ᤁᤢᤗᤢᤶᤔᤥ ᤐᤥ᤺ᤰᤂᤧᤖ ᤐᤣ॥

¹²ᤜᤧᤰᤁᤩᤠᤱ ᤌᤡᤰ ᤐᤠᤱᤓᤣ᤹ ᤁᤢᤒᤣᤛᤠᤱ ᤁᤧᤖᤧᤸᤗᤧ ᤂᤧᤵᤔᤥ ᤌᤡᤒᤥ᤺ᤱ ᤗᤥᤃᤣ᤹ ᤋᤢᤰᤔᤠᤸᤗᤧ ᤕᤠᤱᤄᤢᤛᤡᤒᤠᤜᤠ᤹ ᤋᤢᤔᤢᤛᤡ॥ ᤂᤧᤱᤜᤠ᤹ ᤔᤠ᤺ᤱᤄᤠ ᤔᤧᤕᤧᤶᤛᤡᤱᤅᤠᤱ

¹³ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤋᤧ. “ᤍᤠᤱᤒᤠ ᤕᤧᤛᤢᤀᤣ. ᤀᤠᤏᤡᤃᤧ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤠᤱ ᤀᤠᤏᤢ᤺ᤛᤧ᤹ᤀᤥ॥”

¹⁴ᤕᤧᤛᤢᤖᤧᤀᤠᤱ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤐᤣᤃᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥ ᤀᤥᤛᤣ᤺ᤴᤎᤠᤰᤁᤠᤛᤡᤶᤔᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧᤛᤠ ᤗᤥᤃᤣ᤹ ᤋᤢᤰᤔᤥᤗᤠᤶ ᤔᤧᤏᤢ᤺ᤖᤧᤖᤥ॥

¹⁵ᤜᤧᤰᤁᤩᤠᤱ ᤌᤡᤰ ᤁᤧᤍᤢᤰᤐᤠᤸᤗᤧ ᤂᤢᤏᤧ᤹ ᤏᤢ᤺ᤖᤧᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖ ᤏᤢ᤺ᤰᤂᤧ ᤋᤩᤧᤖᤥ॥

¹⁶ᤂᤧᤴ ᤕᤧᤛᤢᤖᤧ ᤁᤢᤗᤠᤱᤈᤰᤐᤥ ᤛᤠᤶᤒᤥ᤺ᤴ ᤑᤴᤇᤡᤱᤗ ᤏᤥᤃᤧᤴ ᤐᤡᤖᤢᤖᤥ॥ ᤂᤧᤱᤃ ᤛᤠᤔᤖᤡ ᤛᤢᤘᤠᤱᤛ᤻ᤔᤠ ᤘᤕᤧᤖᤥ॥

¹⁷ᤕᤧᤛᤢᤖᤧ ᤐᤠ᤺ᤳᤋᤢ. “ᤁᤴ ᤋᤢᤰᤔᤥᤗᤠᤶ ᤁᤧᤘᤣ᤺ᤵᤐᤠᤜᤠ᤹ᤃ ᤌᤡᤒᤥ᤺ᤱᤏᤧ (᥇᥆) ᤔᤧᤘᤕᤧ. ᤁᤖ ᤘᤣ᤹ ᤑᤠᤱᤛᤡᤜᤠ᤹ (᥏) ᤀᤠᤳᤋᤠᤴ ᤔᤧᤒᤣᤒᤣ᥅

¹⁸ᤀᤠᤰᤂᤣᤀᤠᤱ ᤁᤴ ᤗᤳᤇᤠ ᤌᤡᤶᤔᤧᤴᤍᤱ ᤔᤏᤠ᤺ᤴᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤔᤡᤍᤡᤱ ᤐᤡᤛᤧ ᤏᤢ᤺ᤰᤂᤧ ᤋᤩᤧᤒᤣ᥅”

¹⁹ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤥᤃᤧ᤹ᤀᤠᤱ ᤐᤣᤃᤧ᤹ᤀᤥ॥ ᤁᤧᤏᤛᤠ᤺ᤴᤏᤡᤸᤗᤧ ᤂᤧᤏᤧ᤹ ᤁᤧᤏᤢ᤺ᤛᤧᤖᤥ॥”

²⁰ᤌᤡᤰ ᤕᤧᤴ ᤑᤖᤡᤛᤡᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤀᤠᤵᤑᤠᤸᤗᤧ ᤋᤠ᤺ᤒᤣ᥅” ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤏᤡ᤺ᤔᤏᤠᤒᤠ ᤔᤡᤰᤛᤣ᤺ᤴᤏᤢ ᤔᤧᤍᤠᤏᤧᤴ॥

²¹ᤜᤠ᤺ᤳᤗᤧᤀᤠᤱ ‘ᤂᤧᤴ ᤂᤧᤳᤏᤠ ᤘᤠ᤹. ᤁᤳᤏᤠ ᤘᤠ᤹’ ᤑᤠ᤹ᤀᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤴ॥ ᤀᤥᤔᤧᤳᤋᤧᤶᤔᤧ᤹. ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤱᤃ ᤂᤡᤏᤡ᤹ ᤗᤢᤶᤔᤥᤀᤣ ᤘᤠ᤹ᤖᤥ॥”

²²ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤀᤰᤋᤱᤒᤠ ᤕᤧᤶᤔᤡᤴ ᤋᤠ᤺ᤖ ᤐᤳᤗᤥ. ᤂᤧᤴ ᤕᤧᤶᤔᤥᤃ ᤔᤧᤴᤇᤠᤶᤛᤠ᤺ᤴ ᤁᤢᤕᤧᤴᤏᤥ ᤜᤧᤰᤁᤣᤀᤣ ᤂᤡᤏᤡ᤹ ᤀᤥᤔᤧᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤁᤖ ᤁᤧᤱᤄᤥ᤺ᤛᤢᤶᤔᤡᤴᤗᤥ॥

²³ᤔᤏᤠᤜᤠ᤹ᤖᤧ ᤂᤢᤏᤧ᤹ ᤂᤧᤳᤏᤠ ᤘᤠ᤹. ᤂᤢᤏᤧ᤹ ᤁᤳᤏᤠ ᤘᤠ᤹ ᤗ᤹ᤖᤡᤰ ᤁᤧᤶᤔᤧᤳᤋᤡᤸᤗᤧ ᤂᤢᤏᤧ᤹ ᤁᤢᤀᤥᤔᤧᤳᤇᤧ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ॥

²⁴ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤧᤶᤔᤡᤱᤃ ᤛᤠ᤺ᤶᤓᤣ ᤗᤧᤰᤁᤡᤸᤗᤧ ᤋᤠᤱᤛᤠᤰᤐᤠᤸᤗᤧ ᤌᤡᤰ ᤁᤢᤕᤠᤀᤥᤏᤢ ᤘᤣ᤹ᤛ᤻ᤔᤠ ᤁᤢᤕᤠᤀᤥ ᤌᤠᤖᤡᤰ ᤌᤥ᤹ᤖᤢᤒᤠ ᤁᤢᤀᤡᤛᤡ᤺ᤰ ᤁᤧᤖᤧᤰᤗᤧ ᤔᤧᤏᤡ᤺ᤛᤢ᤹ᤖᤥ॥

²⁵ᤁᤖ ᤁᤠᤰᤏᤢ ᤋᤃᤡ ᤔᤧᤴᤇᤠᤶᤛᤠ᤺ᤴ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤹᤺. ᤜᤧᤰᤁᤩᤠᤱ ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤠ᤹ᤖᤢᤖᤥ॥