San Lucas 17:11-25

¹¹Ijkuak Jesús oyaya Jerusalén, opajpanotia kan tlalmeh de Samaria iwa Galilea.

¹²Ijkuak ya onkalakia itech se altepetl, okinamikikoh májtlakteh tlakah non okipiaya lepra, pero san wejka omoketskeh

¹³iwa okitsajtsilijkeh: —¡Jesús! ¡Tlamachti! ¡Techiknomati!

¹⁴Ijkuak Jesús okimitak, okinmili: —Ximoteitititih innawak tiopixkeh. Ijkuak oyayah itech ojtli, owalpajtikeh.

¹⁵Ijkuakó seme de yejwah ijkuak okitak yopajtik, owalmókopki iwa okiweyijkachiwaya Dios ika chikawak itlajtol,

¹⁶iwa omixtlapacho ikxitla n Jesús, iwa okitlasojkama nin tlakatl samaritano.

¹⁷Ijkuakó Jesús okitlajtlani: —¿Amo non májtlakteh akimeh onompajtikeh? ¿Kanin kateh n oksikimeh chiknawi?

¹⁸¿Sanwel nin tlakatl non amo israelita owalmókopki okiweyijkachiwako Dios?

¹⁹Ijkuakó Jesús okili n tlakatl: —Ximoketsa iwa xio, motlaneltokalis omitspajti.

²⁰N fariseos okitlajtlanijkeh n Jesús, kemania kalakiki itlanawatil Dios. Jesús okinnankili: —Itlanawatil Dios mach motas ijkuak wits.

²¹Amo kijtoskeh, “Nikan ka”, noso “Nepa ka”, porke itlanawatil Dios ya kajki nomonawak.

²²Ijkuakó Jesús okinmili itlamachtijkawah: —Ajsiki n tonati ijkuak nonkinekiskeh nonnechitaskeh Ne Non onimochi ni tlakatl maya san se tonati, pero amo nonnechitaskeh.

²³Iwa nomechiliskeh: “Nikan kajki”, noso “Nepa kajki.” Pero amo xiwiah, nion xikinmotokikah.

²⁴Porke ijkó kemi ijkuak tlapejpetlani iwa tlawia de nin lado iwa asta kan ok se lado de ilwikak, ijkó Ne Non onimochi ni tlakatl sentetl nechitaskeh itech neká iksemi tonati.

²⁵Pero achto nitlaijyowis iwa nechixnamikiskeh n tlakah de ninteh tonatijmeh.