San Lucas 17:11-25

¹¹Na' zej Jesúsen' Jerusalénṉa' len beṉe' ca' zjanaque' ḻe' txen na' gwdie' gan' ndiḻ distritw Samaria len distritw Galilean'.

¹²Na' besežine' to cho'a yež dao' na' besechoj ši beṉe' chese'e yižgüe' da' nzi' lepra jasešague' Jesúsen'. Na' gosezie' zito'

¹³na' goseṉe' zižje gosene': ―Maestrw Jesús, beyaše'laže' neto'.

¹⁴Na' Jesúsen' cate' ble'ede' ḻegaque' na' gože'ne': ―Ḻe šjaya'ac lao bx̱oz ca' cont yeseṉe'e le'e še ba beyacle. Na' goquen' ḻo neza' besyeyacde'.

¹⁵Nach toe' cate' gocbe'ede' bac̱h beyaque', na' bebi'e na' gwṉie' zižje benxene' Diosen',

¹⁶na' bzoa xibe' lao Jesúsen' bi'e ḻe' yeḻa' chox̱clen. Ben' ben ca' naque' to beṉe' Samaria.

¹⁷Nach gwna Jesúsen': ―Beyona' ši beṉe'. ¿Gaṉxe beṉe' ca' yega?

¹⁸¿Toz beṉe' zito' nga bebi'e chonxene' Diosen'?

¹⁹Nach gož Jesúsen' bena': ―Bezoža' beyej to šagüe' to güen. Ba beyacdo' da' chejnilažo' neda'.

²⁰Na' beṉe' fariseo ca' goseṉabde' ḻe' batxen' yid ben' seḻa' Diosen' ṉabi'e nación Israelen'. Nach boži'i Jesúsen' xtiža'gaquen' gwne': ―Ca nac yeḻa' gwnabia' c̱he Diosen', bi naquen da' le'echo.

²¹Nono cheyaḻa' güe' diža' ṉe': “Gwṉa' nga chnabi'e”, o “Gwṉa' na' chnabi'e.” Ḻe ba zoe' len le'e ṉa'a chnabi'e.

²²Nach gože' beṉe' ca' zjanaque' ḻe' txen: ―Gwžin ža cate' ṉale: “Šaca' ṉa'a ba chnabia' ben' gwseḻa' Diosen'”, perw bitw gac can' ṉablaže'len'.

²³Yesenita' beṉe' yesi'e le'e: “Gwṉa'šc nga zoa ben' gwseḻa' Diosen'”, o “Gwṉa'šc na' zoa ben' gwseḻa' Diosen'.” Perw bitw ga'ole ben' yesi'e le'e ca'.

²⁴Can' chac cate' chep yes, chseṉin' doxen ḻe'e yaban' zejzenez, ḻecze can' gac cate' žin ža yida' da' yoble, neda' naca' ben' gwseḻa' Diosen' golja' beṉac̱h. Yida' zejzenez na' yogo'ḻoḻ beṉe' yesele'ede' neda'.

²⁵Zgua'tec de da' zan da' cheyaḻa' saca'zi'a na' beṉe' ca' že' ṉa'a bitw yesejḻe'e c̱hia'.