San Lucas 17:11-25

¹¹Jesús oyaya itich in ohtli tlen ahsi Jerusalén, uan opanotaya campa motlalnamiquih Samaria uan Galilea.

¹²Ihcuac Jesús yoahsitoya itich se altipetl, ompa ocnamiquicoh mahtlactli tlacameh tlen opahpalantoyah, uan san oc uehcatzin omomanacoh.

¹³Yehuan chicauac oquihtohqueh: —¡Tlamachtani, Jesús, ixtechonicnomati!

¹⁴Ihcuac Jesús oquimitac, oquimiluih: —Xonyacan xonmoteixpantitin innauac in teopixqueh. Uan ihcuac yehuan oyahtoyah, opahtiqueh.

¹⁵Semehten yehuan, ihcuac oquitac yopahtic, oualmocuip chicauac cualuehcapantlalihtiu Dios.

¹⁶Omotlancuaquitz uan omixcuatocac itich in tlali inauac Jesús, uan inauac omotlasohcamat. Uan yeh, nin tlacatl opouia Samaria.

¹⁷Jesús oquihtoh: —¿Xamo mahtlactli non opahtiqueh? Uan non chicunaui, ¿canih cateh?

¹⁸¿San yeh nin tlacatzin, tlen dion amo poui Israel, oualmocuip ocuehcapantlalico nitoocaatzin Dios?

¹⁹Uan oquiluih: —Xonmoquitzteua uan xoyau. Motlaniltoquilis yomitzonpahtih.

²⁰In fariseos octlahtlanihqueh Jesús: —¿Quemanian itquitasqueh peuas motlanauatilis Dios nican? Jesús oquimiluih: —Ihcuac nican peuas nitiquiuahcatlanauatilis Dios, amo motas quemeh itlah tlen uili sequita.

²¹Uan amo uilis ictosqueh: “Nicancah”, noso “Nepa catqui”, yehyeh ixconmatican, Dios yoehcoc yomotlanauatilico namonauac.

²²Uan oquimiluih nitlasalohcauan: —Ahsis tonal ihcuac nanconniquisqueh nanconitasqueh niConeu in Tlacatl, masqui san se tonal, uan yeh amo nanconitasqueh.

²³Uan siquin namechoniluisqueh: “Nicancah”, noso “Nepa catqui.” Pero amo ixquimonniltoquilican, dion xonyacan incuitlapan.

²⁴Tlamilauca innamechoniluia, ohcon quemeh ihcuac se tlapitlanil pitlani uan tlanextia desde campa ic panquisa in tonaltzin hasta ic campa pancalaqui, ohcon noiuqui yec motas niConeu in Tlacatl itich in tonal ihcuac ualmouicas.

²⁵Pero achtoh moniqui simi tlahyouis, uan in tocniuan tlen chanchiuah itich ninqueh tonalmeh mahsic amo icsilisqueh.