LUKA 17:11-25

¹¹Ia na Ierusalem e lao heniava negana ai, Samaria bona Galilea tanodia amo e raka hanai.

¹²Hanua maraḡina ta ai e lasi, bena lepra taudia gwauta ia ida e hedavari, to dauhai e gini,

¹³Iesu e boi henia eto, Iesu, biagumai e, ame bogamai hisi.

¹⁴Ia ese e raraidia, bena e hereva henidia, eto, Hahelaḡa taudia dekedia hari aola, bae itamui. Bena vada ela. Dala amo e laova ai kopidia vada e ḡoeva.

¹⁵Bena tamona mo kopina e itaia vada e ḡoeva, e lou ela, mai moale badana ida Dirava e imodaia,

¹⁶bona Iesu aena badinai e goru diho, e hanamoa. A ia na Samaria tauna.

¹⁷Bena Iesu eto, Gwautaosi asie ḡoeva a? Taurahani-ta be edeseni ai?

¹⁸Haida asie lou, Dirava asie imodaia, ina idau bese tauna mo sibona a?

¹⁹Bena ia ese e hamaoroa, eto, A tore isi, vada aola; emu abidadama ese vada e hamaurimu.

²⁰Farisea taudia ese e nanadaia, eto, Dirava ena basileia na edena nega ai bainema? Ia ese e haere henidia, eto, Dirava ena basileia na basinema ena gini-dae ta nariamu ḡauna na heto.

²¹Bona ta basineto “Ḡau na o ina” eiava “Ḡau na o una”; badina na Dirava ena basileia na lalomui ai.

²²Bena ia ese ena hahediba e hamaorodia, eto, Nega ta baine gini dae, umui na ba ura Taunimanima Natuna ena dina tamona mo ba itaia, to basio itaia.

²³Haida na baeto “Tauna o ina” eiava “Tauna o una”: to umui na basiola, muridiai basio raka.

²⁴Badina be kevaru guba kahana ai e kevaru isimu e laomu bona guba kahana na heto, Taunimanima Natuna ena dina lalonai unu baine heto.

²⁵A ia na hisi diaḡau do baine ani guna, bona ina uru taudia ese bae dadaraia.