Luka 17:11-25

¹¹I sar o Isus džala ine nakoro Jerusalim, nakhino maškari Samarija hem i Galileja.

¹²I sar ine đerdini ko nesavo gav, nakoro leste ale deš gubavci kola terdine po dur olestar

¹³hem vičinde: “Isuse, Gospodarona, smilujin tut amenđe!”

¹⁴Ked dikhlja len o Isus, phenđa lenđe: “Džan hem mothoven tumen e sveštenikonenđe!” I sar ine džana dromeja, saslile tari guba.

¹⁵I jekh olendar ked dikhlja so saslilo, irinđa pe koro Isus slavindoj e Devle oto sa o glaso.

¹⁶Pelo anglo lesere pre mujeja đi phuv hem zahvalinđa lese. A ov inele Samarijanco.

¹⁷Tegani o Isus pučlja: “Na li deš saslile? A kaj okola enja?

¹⁸Nijekh li olendar na aračhilo te irini pe hem te slavini e Devle, sem akava jekh kova čak nane ni Jevrejco?”

¹⁹I phenđa e manušese: “Ušti hem dža! Ti vera spasinđa tut!”

²⁰Jekh dive o fariseja pučle e Isuse ked ka avel o carstvo e Devlesoro. O Isus phenđa lenđe: “O carstvo e Devlesoro na avela e znakonencar saven ka šaj te dikhen tumare jaćhencar.

²¹Na ka šaj te phenel pe: 'Ače akatei!' ili 'Eče adari!' Adalese soi o carstvo e Devlesoro maškara tumende!”

²²Tegani phenđa ple učenikonenđe: “Avela o vreme ked ka mangen te dikhen jekh oto dive ked me, o Čhavo e Manušesoro, ka vladinav sar caro, ali na ka šaj te dikhen.

²³O manuša ka phenen tumenđe: 'Eče adari!' ili 'Ače akatei!' Ali ma džan olencar te roden man!

²⁴Adalese so o aviba e Manušesere Čhavesoro ko lesoro dive ka ovel sar i munja ked čhinela taro jekh krajo e nebosoro, a svetlini ko dujto.

²⁵Ali angleder adalestar valjani but te patinav hem te ovav odbacime akala generacijatar.