Lucas 17:11-25

¹¹Jesús Jerusalénsrømay ippe, Samaria pirøwanba, Galilea pirøwanba pureb maywan pureb ya,

¹²kan yamera tsitsø pønrrabnug pubene, møguelø diezelø lepra kwanrrø asr ørø trerabig tøgar katønrrab werruppe, werrubendø, yaptø pønrramisra,

¹³trashibelø køn: —¡Jesús, ñi Kusrennøbig, namun lastima ashcha!— chib.

¹⁴Inchen Jesús ashabe, trenchibig køn: —Judíosmerai sacerdotesmeran eshkanrrab ambay— cha. Inchen nøm ambub pønrramnetø nømui kwanrrøbe tammisra, chishmisrikken kørrømisrøbig køn.

¹⁵Inchen møikkøsrøn nun chishmisrin kui ashabe, truba mur trashib Tiuswan truba tabig waminchib katø arruabe,

¹⁶Jesúswei merrab tømbønsra ‘ungwa, ungwa’ chib maløwan piraugatig utsøbasrøbig køn. Tru møøbe judíoguen kømøtø, samariasriig købig køn.

¹⁷Inchene Jesúsbe trenchibig køn: —¿Kwanrrøwan chishmariilø kørrømisrøbeløbe yamba diez kømmørgøppeh? cha. ¿Nueveeløbe chu ambah? cha.

¹⁸¿Mu katøgan møikken Tiuswan maya nuguen tabig køn chib waminchab arrumuben, i peg pirausriitø Tiuswan ‘ungwa’ chinrrab arru chindah?— cha.

¹⁹Incha tru møwane trenchibig køn: —Kurra, inrrø cha. Kaguende ñui isubigwan nainuutø pasra tøgagúikkurri tabig kørrømisran— cha.

²⁰Fariseosmera Jesúswan Tius nø ashib karub wainuguiibe chu ura punrrerah cha, payen, Jesúsbe trencha løtabig køn: —Tius nø ashib karub wainuguig pubiibe kaptøga ke asha kønrrai attrabikkucha kømøn cha.

²¹Kabe: “Yu pasran” chimøwei: “Uyu pasran” chimøwei inchun cha. Kaguen Tius nø ashib karub wainuguiibe ñimui umbuguen pasran— cha.

²²Incha nui kusrenanøb pera uniilane trenchibig køn: —Na, Møg Misra Arrubig ñimui utu unin kwalømmera, katø kan kwalømzhiitøguen pumønrrabmab, ñim isum kwaløm attrun cha. Inchendø treebe asamig kaanrrun chibig køn.

²³Ñimun: “Yu pasran” tantø: “Uyu pasran” tantø indingucha, ashchab ammøwei, mendig ammøwei inchigay cha.

²⁴Kaguen kan palaig pilabig kandarø srømbalasrøngurri katøgandarøsrø kebilab lataitøwei, tru Møg Misra Arrubig arrub kwalømbe treeg kønrrun chibig køn.

²⁵Inchen treeg pumøwatøbe, nabe chigøben marinab, kaashib indig kømig nebunrrun cha, møi misaamera.