Lucas 17:11-25

¹¹Jesús Jerusalemo jailla llezica, Galilea énɨe fuédamo ite duera jófuemo dúcɨde. Afe jofue daje izói Samaria énɨe fuédamo ite.

¹²Afe jófuemo dúcɨacana llezica, diez dɨga chíinaitɨno jino baɨ Jesús dɨné bitíaɨoɨ. Mei íadɨ afémacɨ Jesúmona baɨ jɨca fɨébidiaɨoɨ.

¹³Afénomona rɨire íena daɨdíaɨoɨ: —Llófueraɨma Jesús, caɨmo dúecai, —daɨdíaɨoɨ.

¹⁴Jesús afémacɨna cɨ́oillano daɨde: —Batɨ́ lletáriraɨnɨmo omoɨ abɨ ácataji, —daɨde. Afénomo íaɨoɨ jailla llezica íaɨoɨmo ite duícuaɨ jacáibicaide.

¹⁵Iemo afémacɨmona dáamɨe ie abɨmo ite duico jacáillana cɨ́oillano, Jesús dɨné abɨdo bite. Billa llezica Juzíñamuimo rɨire cáɨmadote.

¹⁶Jesumo dúcɨillano afémɨe ana énɨemo fueco dɨné bɨ́jɨcaide, Jesuna fɨgora daɨíllena. Afe bie izói daɨdɨ́mɨe Samaria ímɨe.

¹⁷Jira Jesús daɨde: —¿Afe duícomona jíllotaga diez dɨ́gamɨeñede? ¿Néemei jɨáɨe nueve dɨ́gamɨe?

¹⁸¿Meita dama bie jɨcánemɨena Juzíñamuina abɨdo cáɨmaduaɨbilla? —daɨde.

¹⁹Iemona Jesús afe ɨímana daɨde: —Náidacaillano mai jai. O ɨ́ɨnuamona o duícomona ja jíllodɨoza, —daɨde.

²⁰Fariséuaɨ Jesumo jɨcánotiaɨoɨ, “¿Nɨɨrui Juzíñamui illáɨmana illɨrui biite?” Afémɨe uai ote: —Juzíñamui illáɨmana billɨrui jaca cɨ́oñena.

²¹Afena “Ba nɨɨe” daɨínide. Daje izói “Baɨ batɨ́ ite” daɨínide. Mei Juzíñamui illáɨmana illɨno omoɨ cɨ́gɨmo ite, —daɨde.

²²Afe mei ie llófuegamacɨna daɨde: —Uire jɨáɨruido daa birui cue illa izóidɨruina cɨóacaitɨomoɨ, mei íadɨ cɨ́oñeitɨomoɨ.

²³Jɨáɨmacɨ ómoɨna dáɨitiaɨoɨ, “Be nɨɨe,” íemo nɨbaɨ “Batɨ́ ite” dáɨitiaɨoɨ. Mei íadɨ afénomo jáiñeno iri. Daje izói afémacɨdo jáiñeno iri.

²⁴Mei ameo llairilla mona enéfemona jɨca jɨáɨnomo cɨ́oina izói, Nanoide Ɨima Jitó billɨrui afe izói cɨ́ocaizaɨbite.

²⁵Mei íadɨ aferui naɨ dúcɨñeille llezica, afémɨe fueñe jamánomo duere zéfuite. Daje izói bigɨ́maɨaɨ íena ruifíruitiaɨoɨ.