Luke 17:11-25

¹¹Mi tana bona Jesus te sakutua tona i Jerusalem, te va liu haghe i lilighina na bubulo i Samaria mi Galilee.

¹²Me va rughuhaghe ta sakai na komu, ge sodora ga e paregho na kuhu, mara tughuru hauvia,

¹³mara ghaeghahe vania Jesus mara ghaghua, “Lord Jesus, ko arovighai mai!”

¹⁴Me righira Jesus ge bosa vanira, “Kau tona itadira rana manesukaghi, ma kara diki siro tetetei na hulimiu.” Tana bona tara sania Jesus mara sakutua tona tana halautu, me mavo tua na hulidira.

¹⁵Ma sakai tadira, na mane ni Samaria, te righia te marabu tua, ge oli mai me holoutoa God nia na manga sule.

¹⁶Me mai poghotao tana pari tana tuana Jesus, me holoutoa gaia.

¹⁷Keri ge bosa Jesus, “?Agaira e paregho tara mai tagua tara marabu tua, mi vei gaira ra hiua?

¹⁸?E ghua ge na sinogho eni vamua te oli mai ni holoutoana God?”

¹⁹Ge bosa Jesus vania na mane, “Ko tughuru, mo ko tona, nimua taluutuni te negho ge o mavo.”

²⁰Mana balu Pharisee tara huatia Jesus, “?Ingiha vaho ge ke sara mai nina kinakabu God?” Ge bosa tughu Jesus, “Na kinakabu ta God ke mua mai te vaghaa na vaughilala ta righi kalea na pukuna tau kenea.

²¹Me taho ghua hei ke bosa, ‘A eni gaia,’ pa ‘Keri gaia!’ Taho. Na pukuna na kinakabuna God te kabu dila tua i lokamiu.”

²²Keri ge bosa vanira nina vaovarongo, “Na bongi ke mai, ge kau liona ge kau righia sakai tadira na bongigu inau, na Dale Tinoni, ma kau mua righia.

²³Mana balu kara bosa vanighau, ‘Gaia keri, kau righia vaa,’ pa, ‘Gaia eni.’ Kau bei tona ni va keneana gea.

²⁴Mete vaghaa na viti te saopoa na parako, me marara horu mai tana levuna na maramana, me va sara ta sakai na levuna, ke vaghaa ghua keri tana bongina na Dale Tinoni.

²⁵Ke diki vahaghitaili mughua, mana vure ni maramana eni tara vola itaeni, kara nia sika.