San Lukas 17:11-25

¹¹Jisusmi Jirusalinman riqshinaqa, prubinsya Galiliyapa, prubinsya Samaryapa lindirunda pasaykarqan.

¹²Suq kasiriyuman ch'ayaykaptinqam, dyis ismuykaq kwirpuyuq runakuna shamurqan tinguq. Yaqqana tingushpaqam, karupilla shayashpa,

¹³ancha jwirtita nirqanllapa: —¡Yach'achikuq Jisus, yush'ayku noqaykunatar llakipaway! nishpa.

¹⁴Chaymi Jisusqa paykunata rikashpa, nirqan: —Mayá, riyllapa kurakunaman, paykuna rikashushpa: “Kach'akashqanam kangi”, ninambaq. Chaymi chay runakunaqa kurakunaman riqshinaqa, limpu kach'akarqanllapa.

¹⁵Chaymi suqninqa rikashpa: Kach'akashqanam kani, nishpaqa, Taytanchiq Dyusta ancha alabashpa, Jisusmanna kutirqan.

¹⁶Chaymi Jisusman ch'ayashpaqa, ñawpambi qonqorikushpa, pachakaman qaqllanda ch'ayachishpa, ancha pagikurqan. Chay runaqam prubinsya Samaryamanda karqan. (Chay samaryanukunam isrraylinukunawan ancha ch'iqninakuqllapa.)

¹⁷Chaymi Jisusqa nirqan: —Chay fiyu qeshyaymanda kach'akaqkunaqa ¿manachu dyis runakuna karqan? ¿Maypinataq chay nwibiqa?

¹⁸¿Ima, kay furastirullachu kutimushqa, Dyusta alabanambaqqa? nishpa.

¹⁹Chaymandaqam Jisusqa chay runata nirqan: —Atarishpana riy. Noqapi yuyakushpam, kach'akashqana kangi, nishpa.

²⁰Farisiyukunaqam Jisusta tapurqan: —¿Ima tyimputaq Dyusqa rin shamuq kamachikuqqa? nishpa. Chaymi Jisusqa paykunata nirqan: —Dyus runakunapa shunqombi kamachikuptinqam, mana ringillapachu atiq rikayta.

²¹Manam pipis rinchu niq: “Kaypim, waq maypim Dyusqa kamachikuykan”, nishpaqa. Chaqa Dyusqam paypi yuyakuqkunapa shunqombi kamachikuykan, nishpa.

²²Chaymandaqam Jisusqa yach'akuqningunata nirqan: —Suq diyakunam ancha ringillapa munaq rikawayta. Piru manaraqmi ringillapachu rikawaq.

²³Chay diyakunapiqam wakingunaqa rinllapa nishuq: “¡Kaypinam Jisukristuqa!” ichu rin nishuqllapa: “¡Waqpim payqa!” nishpa. Piru chayshina nishuptinllapapis, ama kriyiyllapachu ni paykunawan riyllapachu.

²⁴Chaqa noqa Dyusmanda Shamuq Runam llipyaq rrilampagushina rini kutimuq. Manchu rrilampaguqa tukuy syilupi lliwyan kay ladumanda suq ladukaman. Chayshinallam noqa Dyusmanda Shamuq Runapis yumbay ladukunapi lliwyashpa, rini kutimuq.

²⁵Piru puntatam ancha rini padisiq. Chaqa kay tyimpupi runakunaqam mana baliqpaq rinllapa riqsiwaq.