34मिनु मुरपुकीमी येसु कली “परमप्रभु यावे आ लोव़ ब्रेक्शो किताबमी ‘ख्रीस्त गेनायो मबेक्थु बाक्ब’ देंशो नेंतक। गे चहिं ‘रागीमी जरमेशो क्युक्शा साइक्चा पुंइसीब’ देंनीनी। मिनु मेको रागीमी जरमेशो चहिं सु बाक्म?” दे हिल्लो पाम्तेक्म। भजन संग्रह ११०:४; दानीएल ७:१४
35मिनु येसुमी मेको मुर आन कली “मेको छेङछेङ माइश्शो का गेपुकी नु इच्का नाक्त सम्म बाक्ब। छेङछेङ बाक्म सम्म गाक्कीन। छेङछेङमी मगाक्तीनी हना, छिङछिङमी गाक्चा माल्नीनी। सु छिङछिङमी गाक्बा, मेको ते लाइबा मतुइक्ब।
36छेङछेङ माइश्शो का बाक्म सम्म मेको कली थमा सुतीन। मो पाइतीनी हना, छेङछेङ माइश्शो आ तमी तौ दुम्नीनी” देंत। मिनु येसुमी मेको लोव़ पशा, मेकेर रे गाक्शा ख्रुंइसाक्व। एफिसी ५:८
37मिनु येसुमी मुर आन ङोंइती शुश छक लाक्चा ङा गेय पाप्तु हना यो, मेकोपुकीम येसु कली थमा मसुदेम।
38मोपा यसैया माइश्शो परमप्रभु यावे आ लोव़ पाइब आ ब्रेक्शो लोव़ थमा दुम्त। मार ब्रेक्शो बाक्त देंशा हना “प्रभु, आंइ देंशो लोव़ सुम थमा सुदा ङा? इन पशो गेय सुम तुइक्ता ङा?” दे ब्रेक्शो बाक्त यसैया ५३:१
39मोपतीके सुइमी थमा सुइक्ने मचबेम। यसैया ६:९,१०
40मिनु यसैयामी “परमप्रभु यावेमी मेको आन कली मिक्च मताइब सेल्तीमी। मोपा परमप्रभु यावे कली मतुइक्नीम। मेको आन कली मटीब सेल्तीमी। मोपा मेकोपुकीमी परमप्रभु यावे आ लोव़ रुम्ने मचबेम। मिनु परमप्रभु यावे कली ‘आं कली सापतीन’ दे मपुंइनीम” दे यो यसैयामी ब्रेक्शो बाक्त। मत्ती १३:१४-१५
41मारदे हना यसैयामी येसु ख्रीस्त आ छेङछेङ ङा सक्ति ततीके येसु आ पर्बम लोव़ पशा ब्रेक्शो बाक्त। यसैया ६:१
42ठेयब मुर शुशेमी येसु कली थमा सुइक्तेक्म। मेकोपुकीमी “फरिसीपुकीमी आंइ कली यहूदी आन ग्रुम्तीक खिं रे तिल्नीम” दे हिंशा, अरु आन कली “गो थमा सुइक्ब दुम्तक” दे मदेंम। यूहन्ना ९:२२
43मारदे हना मेकोपुकीमी “आंइ पर्बमी मुरपुकीमी मार देंनीमी” दे परमप्रभु यावे क्येङा मुरपुकी तशा हिंतेक्म। यूहन्ना ५:४४
44मिनु येसुमी ठेयब सेंदा पशा “आं कली थमा सुइक्बमी आन थमा सुइश्शो आं कली ला ममाइ, तन्न आं कली सोइक्ब कली यो थमा सुइश्शो नम।
45मिनु सुम आं कली ताइबा, मेकोमी आं कली सोइक्ब कली यो ताइब। यूहन्ना १४:९
46रागी ङा मुर आन कली परमप्रभु यावे आ पर्बम तुइक्पाइक्चा कली गो रागी कली छेङछेङ दुम्शा जाक्ती। मोपतीके सुम आं कली थमा सुइक्बा, मेको छिङछिङमी मबाक्ब।