John 12:34-46

³⁴Than pam wanch al-alangan wik inangan ngeeyin nunang-a, thanan thawin, “Ngan puth wik kan ngeeyan lat ngench thayanamana, nil pam anman nil God.angan keenkanaman kaaꞌngak kuchowan ngamparan-a, nilan aak umpuyaman ngul wunow! Nint puth ngeenak thawangan pam nil God.angan kuch nunang-a, yukang kenyan waanchayn nunang e? Nil ngul pam inan weeꞌa, God.angan kuchan a?”

³⁵Puth nil Jesus.an thaw thant ngul, “Ngay keꞌ nganth ngangk niiyantamakana. Ngay puth ingan yaam keꞌ wuning ngula, ngay manyam thonakam wunāng niiyantanga. Niiy ngayang anman monkan-wak-wakān ngay yippak inman niiyantangana, niiy yipam nganth keꞌanangan keꞌ iiyāna, niiy yipam woyan God.antaman keꞌ kumān keꞌ pam wanch anangan aak ngaaꞌangan yimanangan iiy-iiyantan.

³⁶Ngayan yippak niiyantangan iiy-iiyang-a, niiy kan-kanam ngangkangan piꞌ-piꞌān ngayanga, niiy yipam keꞌ ngay anman ngul iiy-iiyāna!” Nil Jesus.an wik inangan kanan thaw thantan-a, nil kan-ngul iiy, kaaꞌwal thench nungamang thanttaman, pam wanchantam.

³⁷Nungkway nil work piꞌ-piꞌan min-miniy meeꞌ thanttangan yump-yump-a, than puth pam wanch yotangan keꞌam ngangkangan piꞌ-piꞌin nunanga, yaꞌa.

³⁸Puth wik nil pam prophet Isaiah.angan keenkanaman ump-a, an kan-kanam waaꞌ. Wik yimanangan umpa, “Lord-ang, ngul than weeꞌ-weeꞌanang ngaantam-ngeeyin wik ngalan waaꞌ-waaꞌal thant a? Nint puth nungkamangan kan meenathan thant nint wuut piꞌanana! Puth yaꞌa, pam wanch thinhan, keꞌ ngeeyiythan, yaꞌa.”

³⁹Than pam wanchang nanpalan ngangkangan keꞌam piꞌ-piꞌin nunang,

⁴⁰nil puth Isaiah.angan wik thon thamp ngul waaꞌ, “An keꞌ God.ang meeꞌ koꞌanch yump thanang thanan yipam keꞌ thathayn nil God wanttakan. An keꞌ nil kuchek-thayan yump thanang, than kaangk keꞌ-ngulan minan iiy-iiyayn, than yipam keꞌ-ngul ngaantam-ngeeyayn nunangan, aꞌ puth woyan way anman wak-wakayn, keꞌ-ngul wantiythan. Nil God.angan puth kaangk min yumpow thanang, puth yaꞌa, thananiy-a, kaangk keꞌ wampayn nungant.”

⁴¹Nil Isaiah.angan wik inangan waaꞌ puth nilan nathpalman kan ngaantam-ngeey nunang Jesus.an nil puk nhengk God.antaman, pam wuut piꞌanan. Aꞌ nil wikan waaꞌ-waaꞌ nungantam Jesus.antaman.

⁴²Puth than pam piꞌan Jews.antam wiy anangan epa, ngangk theeꞌin nungant, Jesus.antan, puth thanan wik pam wanch yotantang keꞌam waaꞌ-waaꞌin thanttakaman, yaꞌa, than puth winynyang moꞌin thanttam, than puth ngul kenthin thanang church thanttam amanaman.

⁴³Than pam piꞌ-piꞌanam Jews.antam al-alangan puth kaangk than pam wanch wiyangan min waaꞌayn thanang, than puth keꞌam ngaantam-ngeeyin nil God.angan nath min waaꞌow thanang, nath yaꞌa.

⁴⁴Anpalaniy-a, nil Jesus.an thaaꞌ-ay thaw, wik inangan, “Than weeꞌ-weeꞌanangan ngayang ngangkangaman piꞌ-piꞌantan-a, an than ngayang thonakam keꞌam ngangkang piꞌ-piꞌantan, yaꞌa, puth than nunang tham ngangkang piꞌ-piꞌantan nilan kuch ngayang aak iikanakan.

⁴⁵Aꞌ than weeꞌ-weeꞌanangan ngayangan thiichantan-a, an than nunang tham thiichantan nilan kuch ngayang aak iikanakan.

⁴⁶Ngay aak iikanakan wampangan, keꞌ nganth yimanangan, ngay yipam umputh iiy-iiyāng woyan wakanan, than pam wanchangan yipam thathayn, woyan min piip God.antamakan wun. Puth than weeꞌ-weeꞌanangan ngangkangan piꞌ-piꞌantan ngayang-a, an than aak ngaaꞌangan keꞌ wuniythan, nganth keꞌanangan, an yaꞌa.