SAN JUAN 12:34-46

³⁴Nɛ nu yʉ ją'i bʉya bi dąt'a: ―Nugähe ya dá øhmbe im mam bʉ ja rán t'ɛ̨di Oją, i 'bʉi mazą̈i a ra Cristo. Nɛ guí ɛ̨nsɛ jatho gui tu bʉ ja ra pont'i, gán ją'i ua ja ra ximhäi. To'o e ngue guí ɛ̨nsɛ gán ją'i ua ja ra ximhäi. Masque hinga gue'e gra Cristo 'bʉ.

³⁵Nu ra Jesús 'bex bi 'yɛ̨mp'ʉ: ―Him min ngu yʉ pa ga xän'nahʉ ya, ngue drán nɛquigä. Nde'bʉ gan 'yohʉ bʉ ja ran nɛqui ya, nɛ hin da zʉ ahʉ ra 'bɛxui. Nguetho nu'a to'o i 'yo bʉ ja ra 'bɛxui hingui pądi hapʉ i 'yo.

³⁶Dami hyąmhbʉ ran nɛqui ya, janya i ja ya, nɛ din ja ran nɛqui ni mbʉihʉ bʉya, bi 'yɛ̨mp'ʉ. Nɛ nu'bʉ mí jua a bi man ra Jesús bi mba, bin 'yąnsɛ.

³⁷Pɛ guexta'a him bi 'yɛ̨c'yɛi xʉn ngu ma mijudíohe, madague'a xʉn ngu yʉn t'øt'e nuįxte bi nu bi 'yøt' ra Jesús.

³⁸Pɛgue bin ja tengu thoho bi man ra pøngahyą Isaías 'bʉ mí ma 'bɛ'a din ja, bi 'yɛ̨na: Ma Hmu i, to'o maha bi 'yɛ̨c'yɛi a dá mamhbe nɛ to'o bi bą 'bʉ gmí 'yuh ni ts'ɛdi, bi 'yɛ̨na.

³⁹Him bi zä bi 'yɛ̨c'yɛi ʉ 'da nguetho nu'bʉ him mín nde ʉ, bi mba njapi tengu bi man ra Isaías 'bʉ mí ma mahøn'a:

⁴⁰Nu'a Oją bi gomba yʉ́ dä ʉ nɛ bi mɛp yʉ́ mbʉi ʉ, gue din ja tengu'bʉ din xädä, nɛ hin din ja yʉ́n 'yomfɛ̨ni yʉ́ mbʉi, nɛ hin da zä di päh yʉ́ mbʉi gue xtí punba Oją ʉ, bi 'yɛ̨n a ra Isaías.

⁴¹Guehna bi man ra Isaías 'bʉ mí 'yut Oją din ja rá ts'ɛdi nuįxte ra Cristo, nɛ bi mam bʉya 'bɛ'a da 'yøt'a ra Cristo.

⁴²Pɛ xʉn ngu ma ngʉrpihe mim bɛ̨nsɛ ngue ɛ̨c'yɛi ra Jesús. Pɛ him bi ma gue ɛ̨c'yɛi ʉ, nguetho i su xtá hyøn a thi yʉ fariseo bʉ ja yʉ́ niją, gue má zä da zan'ʉ.

⁴³Nguetho man'da bi bɛ̨ni 'bɛ'a da man yʉ́ miją'ihʉ, gue da 'yɛ̨mbi xʉn ho ʉ, xinda gue'bʉ go xtá 'yɛ̨mp Oją xʉn ho ʉ.

⁴⁴Pɛ nu ra Jesús nts'ɛdi bi ma: ―Nu'a to'o i ɛ̨c'yɛigui, i ɛ̨c'yɛi a bá pɛngui.

⁴⁵Nguetho nu'ʉ to'o i pąqui, i pą a bá pɛngä.

⁴⁶Nu'a bá ɛ̨cä gue ga yorba yʉ́ mbʉi ʉ 'bʉcua ja ra ximhäi. Nu'a to'o da dɛngui hin din 'yo bʉ ja ra 'bɛxui a.