Yohan 12:34-46

³⁴Haú hkûn, haû byù moq mó gi, "Haû tarâ laiká má, Hkrisduq gi, ahtum abyuq dui nyì râ nghut lhê gâ é lé sheq, ngamoq wó gyô wú é ru nghut le nhîng, 'Haû Byu Yhangzo gi, tu shap é hui ra râ nghut lhê.' nghû, Nàng hkâsu kut wó taî lhê lhú? Haû Byu Yhangzo gi, ó yuq nghut lhê lhú?" ga, myî akô.

³⁵Haû mù, Yesuq gi, yhangmoq lé, "Nungmoq chyáng, haû maubó joq nyì râ ahkyíng gi, a lûm myáng lo nghut ri. Mauchut gi, nungmoq chyáng a hkyit jé sháng gaq, nungmoq chyáng, haû maubó joq nyi ashî hkûn sô nyì keq; hkâsu mù gâ le, haû mauchut má sô nyi é sû gi, yhang hká shut e ló nyi é lé, a sé nghut ri.

³⁶Nungmoq gi, maubó é yhangzô pé wó dut kó sháng gaq, haû maubó joq nyi ashî hkûn, haû lé lumjíng keq." ga taî ri. Yesuq gi, dang haû ban taí jáng, yhangmoq chyáng mai htoq ló luî, haq byuq bê nghut ri.

³⁷Yesuq gi, yhangmoq é hí má, limik kumlhá haú pé banshoq kut shit kôlhang, yhangmoq gi, Yhang lé a lumjíng shi kó nghut ri.

³⁸Haû gi, "Yhumsîng ê, nga-nhûng é danglù lé, ó yuq wá lumjíng byî wú é lhú? Haû Yhumsing é loq gi, ó yuq lé htoq shit wú é lhú?" ga, myiqhtoi Esai-aq taî tô é dang lo dik é nghut ri.

³⁹Yhangmoq a wó lumjíng kô é hkyô gi, Esai-aq taî é dang má,

⁴⁰"Yhang gi, yhangmoq é myoqjí lé lhoq chit byi luî, yhangmoq é i-myit lé lhoq htan to byi bê nghut ri; haû mù, yhangmoq gi, myoqjí èq a wó myâng, i-myit èq a wó sê gyo, Ngò, yhangmoq lé yâ ge byi râ matú, a wó lhing taû lò kó dut râ nghut lhê." ga le bo tô é yanmai nghut lhê.

⁴¹Esai-aq gi, Yesuq é hpungwup shingkang lé myang é yanmai, Yhang eq sêng é hkyô lé, haû su ga taî é nghut ri.

⁴²Nghut kôlhang, haû uphkâng bang myo myo lháng gi, haû u má, Yesuq lé lumjíng bum akô. Nghut kôle, yhangmoq gi, Hparishe pé èq tarajong mai lhoq htoq pyâm é hui râ lé, gyuq kô é yanmai, yhangmoq lumjíng bê hkyô lé a yín yu bùm kó nghut ri.

⁴³Hkâsu mù gâ le, yhangmoq gi, Garai Gasâng chyáng mâ é aróng lé, ô nau é htoq má, byu pê chyáng mâ é aróng lé, je ô naù kô é yanmai nghut ri.

⁴⁴Haû mù, Yesuq, htê mó èq taî é gi, "Ngo lé lumjíng é sû gi, Ngo lé baú lumjíng é a nghut; haû Ngo lé nhang kat é Sû lé le, lumjíng é nghut lhê.

⁴⁵Ngo lé myang é sû gi, haû Ngo lé nhang kat é Sû lé le myang é nghut lhê.

⁴⁶Ngò gi, Ngo lé lumjíng é sû ó yuq le, mauchut hkaû má a nyì sháng gaq nghû, maubó dông mingkan má lé jé é nghut lhê.