Ioanes 12:34-46

³⁴Ta gid ipom tikeo, “Gai aoatai mambe apu ikeo ga oangga Kristus inam, ei ga imamado somisomi ga ilalala ga ila. Tota eao kamado keo ga gid manta tisoa Eaba Inat ga idae? Eaba Inat sai toa?”

³⁵Ta Iesus ikeo pagid bedane, “Taranga ga ienono pagimi mole mao. Manta alalala ngan taranga ngan ado kemi labone toa ienono pagimi. Ngan kado ta dodom inam ta irobi gimi. Be oangga sai ilalala dodom, ei iuatai ngan tibur isaoa ilalala ngan oa mao.

³⁶Labone taranga ienono pagimi. Manta lolomi matua ngan taranga, ta gimi aot panua taranga ami.” Io, Iesus iposa bedane ga kus ta itnan gid ta imumul ngan gid.

³⁷Tautaunga Iesus ikado uisinga busa matadeai, be lolod matua ngan ei mao.

³⁸Kadonga toa ne iuot ta iparangrang posanga ton Aisaia, eaba ibada Deo iaoa mugaeai. Ele posanga ga bedane, “Maron, eaba eta ilolo matua ngan lemai posanga mao! Be eaba eta iuatai kemi ngan naurata toa ipasolan uram kapei ne mao.”

³⁹Ngan ipu toaine lolod matua mao. Ngansa Aisaia ibode posanga ede pade ga bedane,

⁴⁰“Deo ikado ga matad sususu ga laborad irangrang ngan ibada danga eta mao. Ngan kado ta matad inasi kemi, ga laborad ibada posanga, ta tipul lolod ga tinam pagau. Toa bedaoa ta nakado kemi gid. Be eine mao.”

⁴¹Aisaia ikeo bedaoa ngansa igera Kristus ele taranga ta iposaposa ngan ei.

⁴²Be tautaunga madidnga busa tede lolod matua ngan ei, be tiposa masaeai ngan mao, ngansa timataud gid Parisi. Ngan kado ta tisuk gid ta tirangrang ngan tila ngan luma raring aea pade mao.

⁴³Ngansa tikim tau ngan gid panua tipakuru ngan gid, be tinid ngan nasinga edap toa Deo ikeo ga tinasi ngan badanga pakurunga.

⁴⁴Idio ta Iesus ipotalae ta ikeo, “Oangga sai ilolo matua ngan gau, eine ilolo matua ngan gau kekelegau mao, be ilolo matua ngan Eaba toa isula gau ga nanam.

⁴⁵Oangga sai igera gau, eine igera Eaba toa isula gau pade.

⁴⁶Gau nanam tanoeai mambe taranga, ta oangga sai ilolo matua ngan gau, eine ga imamado dodomeai mao.