John 12:34-46

³⁴Sabu kuayo gagamin on siyafotai siyau, “Ot ati Baifafaro dura ikasonet on Orot Rurubinin on arimon inama au wantoan. Ato Om mamaba uyau on Orot Natun on sinbogaiai inag nabai inarab? Ato atonio Orot Natun on Iyafan i?”

³⁵Iesu iyafotes iyau, “Tafa on men weromin arimon omi sanamui inen on. Tafa bisimui yen on nana wonabib wonnanan, onai wouman on men intaragabuem mes; iyafan ato woumanai ibib enan on men isagob menan nan ibib enan.

³⁶Tafa bisimui yen on On wonitutumai onai omi on arimon tafa an sabu wonmatar.” Iesu ato dura iyau gibunai on, osi sabu ikirires inai mabinai nan iyob.

³⁷Basit Iesu on atonio osi bobo buburis engon osi sabu nasi ifouren min on, baise osi On men situtumai on,

³⁸onai aubairuruotin Isaiah dura aifan i’yau on inat idura bag: On iyau, “Bada, wei dura wabikakafun on iyafan intatam initutum? Sabu iyabon auris on Bada an faiwar rerebai ibo igat iyoboes i?”

³⁹On yabinai osi engon tutufin men fofonin sititutum yabin Isaiah mat iyau,

⁴⁰“God on osi matas ibofofoten a nunuas irufofoten onai osi men matas siteit men, a osi nunuas on men fofonin sitsagob. God iyau, osi men fofonin Yau auriu sinrutabir aniyawasis on.”

⁴¹Isaiah atonio dura iyau yabin on Iesu an Aiwab it on God ba ato on aurin ikakafun.

⁴²Baise Jew babadis sigaraba on Iesu situtumai; ab Pharisee yangan auris siber on mes osi men fofonin On aurin on wasai nan dura sitikakafun on, ari osi bayoi goa emon sityatetis sitgat on mes.

⁴³Osi asi nuabo on sabu ra engon osi sinbifais, ato osi men segogoi God osi inifais on.

⁴⁴Iesu fonan gagaminai iyau, “Iyai iyafan Yau ebitutumeu on men Yau ekesiu wat, ab Iyafan Yau ibiyafareu on mat ebitutumai.

⁴⁵Iyai iyafan toun matanai Yau i’teu on ato Iyafan Yau ibiyafareu on mat toun matanai eitai.

⁴⁶Yau on tafa ba nin anat au tafanam onai iyai iyafan Yau inbitutumeu on men womanai inama mes.