San Juan 12:34-46

³⁴Tsigo lëë meñ chëb: —Lo xleey noo xñee nii tsiñee lëë Crist kiid kpidy xaa. ¿Penak tsigo xñeel no nii kety mguiy nii pxaal Dios? Cho nak kaa mguiy nii pxaal Dios.

³⁵Lëë Jesús chëb: —Xtsedre kan do bini. Kol kyënsë lëë ka lëë bini bii no parñee jkaady to nguey, por nandy kchë meñ nii xkyënsë lo nguey pa si.

³⁶Lëë ka bii chan do bini, kol jkaaxcuento parñee tugak tsow lo do. Loxsye chëb Jesús ngo lëë xaa bi aan lëë xaa kwyolan lo meñ go.

³⁷Nikxe nii kon meñ kchë kyalntson nii beeñtsyey Jesús, bnilasty meñ xtiits xaa,

³⁸sink lëë meñ beeñ cumplir nii pkëë profet Isaías tsiñee chëb xaa: Tat Tios, ¿cho bniladzy xtiitsoo na dyon? ¿Cho lo bluuy gaal xkyalwnabeyoo?

³⁹Pchilody niladzy meñ xtiits Dios, porñee lë gak profet Isaías pkëë sinrii:

⁴⁰Lëë Dios ptse lo meñ ni lëë xaa beeñ jkyedzy styoo meñ, parñee kandy meñ ni kyeñdy meñ. Kchë nrii ptsyool meñ parñee ktikchedy meñ styoo lon, tsiin ktsilyaa xtol meñ.

⁴¹Kchë nrii kwnee Isaías porñee kon xaa xkyalwnabey Jesús aan lëë xaa bitiits xa nak kyalwnabey go.

⁴²Nikxe nii singo chëb Isaías, ndaly meñ Israel nii xñabey bniladzy xtiits Jesús, per kwneedy xaaw porñee ptsyeb xaa ngwii xaa fariseo xaa ktoo.

⁴³Singo beeñtsyey xaa go porñee xyore xkyalnsaak meñ lo kislyu re styoo xaa que xkyalnsaak Dios.

⁴⁴Lëë Jesús chëb: —Kchësy meñ nii xniladzy xtitsaa lëdy nonsy xtitsaa xniladzy meñ go, sink wi xtiits xaa nii pxaal naa.

⁴⁵Ni wi gaa lo xaa nii pxaal naa xuy meñ nii xuy lon.

⁴⁶Naa nak bini nii biid lo kislyu parñee kyënsëdy kchë meñ nii kniladzy xtitsaa lo nguey.