John 12:34-46

³⁴Awarate embo jiwae be mi be pigedo mina sisera, “Nangoda agodari mi seuri gido era soregari embo God mi itari bugarase sisira awa mata awodo atadira. Edo imo ro edo sesi God da mei embo isira awa ungo mi jigoro erarase sesi? Embo eiawa averi?”

³⁵Edo ungo awodo setero Iesu mi mina sisira, “Iji tupo usasa awa ingode daedo atadira. Edo doawo umenga mi ingo apuregeure ta usasa atira einde usasa da atiwo. Edo awodo ewo ainda be awa embo ave umenga da pepeta ira awa umo yei rawainda mambutiri awa umo gaera awa sedo.

³⁶Na awa usasa awa ra awasedo na ingode atena ainde na ge be ewo. Edo na ge be ise pepeta irirowo usasa mi iji berari ingo awa jiroroka are.”

³⁷Edo Iesu awa sedo umo yei da ungo mi umo gari sago ae ainda mambusira. Edo Iesu ari wasiri nembogamo jiwae be eitri embomei amimi gosisera te ungo umo ge be ae isera.

³⁸Edo ro God da binga sari embo Isaiah mi sisira awa be isira. Edo Isaiah mi sisira, “God, embo amemi binga nango mi era mo ge be eri? Edo amemi God da ari wasiri goroba de awa gido uso binga ge be eri?”

³⁹Edo ge nei Isaiah mi sisira amimi kondade ari nango ungo roedo ge be ae iseri awa gadera.

⁴⁰Edo Isaiah mi sisira, “Ungo ungoda diti mi georase God mi ungoda diti awa apuregetira. Ungo ungoda jiro mi georase God mi ungoda jiro awa gajetira. Edo God mi sira ‘Ungo mi naso yei wareregadi ae awasedo na mana ungo awa ewamei adena.’”

⁴¹Isaiah mi eiawa sisira ainda be awa umo God uso gitijigari yei da atima isira ainde Isaiah umo gido umo awa ge sedo isira.

⁴²Edo Jew embobo da babojegari jiwae be Iesu ge be isera te ungo embo nenei da yei sae isera ainda be awa ungo Pharisee embobo mi Jew embobo da dada ari oro da awa wawara oro wowosae isera.

⁴³Edo ungo embo mi ungoda yei doio sorase dipapa isera te God mi ungo doio sarase awa ungo be kotae isera.

⁴⁴Edo Iesu mi embo da yei minonu sisira, “Embo ave na ge be era embo awa God na itiri bugusena awa ge be ira.

⁴⁵Edo embo ave na embo averi awa gosira embo awa God na itiri bugusena awa gosira.

⁴⁶Na awa teta usasa awodo busu da wowosisena awasedo embo ave na ge be ira awa umenga da atae ra.