Yohanesi 12:34-46

³⁴Ainanaya kaiwasa bitoya foi emadu wei eteyo, “Na Kaiwo Musai soi fo, amewaitawanai we Kristusio ahui we Mananu Mampariri foi mireha kahai mae minohi darang we fitawafa, ampafe todoni fino boyo, ‘Kaisung Inontarai nei todoni kontaio yuaisia dedai,’ nina? Tuti Kaisung Inontarai nei mani mandoni dine?”

³⁵Yesusi medu wesa aha deyo, “Sambewaranei niayai ria mea na ninai we rahidafeai waroi aha kaha. Ampafe Sambewaranei niayai rahang mea nina ne rai mani, mera nai, bereri mani mamantitifoi soru mea rai. Weo mano da na mamantitifo mani, wiro deitawang da weafo kaha.

³⁶Meroaso Sambewaranei na rahida Sambewara nani niayai rahang mea nina ne, ambori mewearikangno Sambewarai.” Yesusi medua kai tonanafo, da wa dediwa werusara.

³⁷Yesusi niari fitantuma bitoya paria na inontarai Yahudi fosa euremireafo, tonanai ki wape wiro eroasoi kaha.

³⁸Finanai ambori mai kariri Sempaisi ne Kaiwo nabi Yesayai medurai deyo, “Sengne waune, toyari manei wiro yoaso kaiwo amemadura ne kahaia. Tuti boinawi nemu mambiriufo wesa tonanai ki, mae eroasoa kaha ne rai.”

³⁹Nanai wedaya wiro ewemambiriu we eroasoa kahai, weo Yesayai medurai kawuru kontai ampa deyo,

⁴⁰“Allai medu deyo, ‘Yau inari euremifoa kabe tuti enemirorongfoia mitubaru, ambori wiro ewati fi inari nanai na euremifo fanai, tuti etafurai na enemitituaitafo fanai. Ambori wiro etaraberasa we yau ma we inarisa ebeng fanai.’ ”

⁴¹Yesayai medu tonanai we deti Yesusi ne sambewaraio dedai fo kawuru ampa tuti medu kariri Yesusi tonanai.

⁴²Tonanai ki wape mano ewenunggamiei we Yahudi fosa bitoya eroasoi kontai. Wape wiro eteiai ene eroasoai nanai para kaha, weo ematai Farisifosa we dohonao na tonanane etatasa weru munu agama fo fe.

⁴³Weo mano ewenunggamiei we Yahudi nanisa esera terai we inontarai etaparandinsa, sewa weru Allai deparandinsa fo.

⁴⁴Ainanaya Yesusi sahu deyo, “Mandoni kontaio yoaso yau fo mani, wiro yoaso yau tera kaha, mae yoaso Mano demi yau foi,

⁴⁵tuti mandoni dino deti yau fo mani, wenani kontaio deti Mano demi yau ma foi.

⁴⁶Weo ira to nunei ma nina ne we iweSambewarai, ambori mandoni saino eroaso yau fo mani, wiro enayai na mamantitifo aha fanai.