San Juan 12:34-46

³⁴Jayave jae reta jei Jesús pe: —Mboroócuai pe oyecuatía oi vae omombeu oreve Cristo jecuaeño oico. ¿Mbae pa oipota jei jocuae nde rere vae? Echa nde rere iru vae reta oupita ɨvɨ güi cuimbaera oyeapo vae. ¿Quia pa co jae cuimbaera oyeapo vae? —jei reta.

³⁵—Tembipe oico vɨteri pe reta ndive —jei Jesús—. Erei ngaraa ɨma opɨta pe reta ndive. Peguata tembipe oico pe reta ndive rambueve, agüɨye vaera pɨtu peve. Echa pɨtumimbi pe oguata vae mbaeti oicuaa quetɨ ojo —jei—.

³⁶Tembipe pe reta ndive oico rambueve, perovia tembipe re, pe reta pei vaera tembipe rami —jei chupe reta. Cuae jei ma yave, Jesús ojo chugüi reta, jare mbaeti ma ipuere reta ovae chupe.

³⁷Erei yepe tei Jesús oyapo jeta mɨacañɨ reta jae reta jovaque oicuauca vaera tei chupe reta quia co jae, erei jae reta mbaeti güɨrovia jese,

³⁸oyeapo vaera Isaías oicuatía vae - Isaías co jae Tumpa iñee aracae omombeu vae. Echa Isaías oicuatía corai: CheYa, ¿quia pa güɨrovia romombeu vae? ¿Quia nunga vae pe pa reicuauca nembaepuere? Jocorai oicuatía Isaías aracae.

³⁹Jae rambue jae reta mbaeti ipuere güɨrovia. Echa Isaías oicuatía ye corai:

⁴⁰Tumpa oyapo reta jesa mbae vae reta rami jare omopɨatanta, agüɨye vaera omae cavi reta, jare agüɨye vaera oicuaa cavi reta, jare agüɨye vaera oyerova icotɨ. Echa oyerova yave Tumpa cotɨ, Tumpa ombogüerata tei co. Jocorai oicuatía Isaías

⁴¹Isaías cuae jei, oecha yave maemboete pegua vae. Jae rambue imiari jocorai jese.

⁴²Erei amogüe mburuvicha reta güɨrovia Jesús re. Erei mbaeti oipota jei jae co Cristo fariseo reta jeco pegua. Echa jocorai jei yave, fariseo reta omombota tei co judío reta itupao güi.

⁴³Echa jae reta oipota yae japicha reta omboete vaera Tumpa omboeteuca vaera güi.

⁴⁴Jayave Jesús iñeeata reve jei: —Cheré güɨrovia vae mbaeti chereño güɨrovia. Güɨrovia chembou vae re —jei—.

⁴⁵Cherecha vae oecha chembou vae vi —jei—.

⁴⁶Ayu ɨvɨ pe amee vaera tembipe ɨvɨ pegua reta pe, agüɨye vaera cheré güɨrovia vae opɨta pɨtumimbi pe —jei—.