San Juan 12:34-46

³⁴Të Jesús bunách zian naꞌ, taꞌná: ―Netuꞌ byö́nituꞌ nup gululáb le rna bëꞌ zxba queëꞌ Dios, lë naꞌ rna: “Sóateczëꞌ Cristo.” ¿Nacxcz nac, rnauꞌ Liꞌ: “Run bayúdx Bönniꞌ Nuhuöaquëꞌ Gdu Bunách, luchisëꞌ Lëꞌ xtsaꞌ”? ¿Nuzxa naꞌ Bönniꞌ Nuhuöaquëꞌ Gdu Bunách?

³⁵Niꞌr Jesús rëꞌ lequëꞌ: ―Yetú chiꞌidauꞌz sóalenaꞌ lbiꞌiliꞌ nedaꞌ, nacaꞌ yeníꞌ queëliꞌ. Gul‑tá tsal ni zóalenaꞌ lbiꞌiliꞌ len dë queëliꞌ yeníꞌ, cui gchul nitliꞌ. Nu bönniꞌ rdëꞌ ga chul xöhuiꞌ cutu nöznëꞌ gazx zijëꞌ.

³⁶Tsal ni zóalenaꞌ lbiꞌiliꞌ nedaꞌ, nacaꞌ yeníꞌ queëliꞌ. Gul‑tsejlëꞌ nedaꞌ nacaꞌ yeníꞌ queëliꞌ quië gléꞌiliꞌ yeníꞌ naꞌ nac gdu. Catiꞌ budx bëꞌë didzaꞌ ni Jesús, yhuöjëꞌ yajcachiꞌ lahuëꞌ lauquëꞌ.

³⁷Zal‑laꞌ benëꞌ Jesús zian yöl‑laꞌ huac lauquëꞌ, cutu gulayejlëꞌë Lëꞌ.

³⁸Cni guc quië butság lë naꞌ buzujëꞌ lu guich Isaías, bönniꞌ bëꞌë didzaꞌ uláz queëꞌ Dios, gnëꞌ: Xan, ¿nuzxa caz gyejlëꞌ didzaꞌ bëꞌtuꞌ? ¿Nuzxa caz buluiꞌinëꞌ lei Xanruꞌ yöl‑laꞌ huac queëꞌ?

³⁹Cni guc, cutu guc laꞌyejlëꞌë Jesús. Guc ca naꞌ gnëꞌ caꞌ Isaías:

⁴⁰Dios benëꞌ ga gulachúl gulanitiëꞌ, Atiꞌ guc zid ládxiꞌdauꞌquëꞌ Cui laꞌléꞌinëꞌ len yöj lauquëꞌ, Len cui laꞌyéjniꞌnëꞌ lu icj ládxiꞌdauꞌquëꞌ. Cutu luhuöaquëꞌ quiaꞌ quië úngacaꞌ‑nëꞌ.

⁴¹Bëꞌë didzaꞌ ni Isaías le bléꞌinëꞌ yöl‑laꞌ yeníꞌ queëꞌ Cristo, len bëꞌë didzaꞌ ca nac queëꞌ Lëꞌ.

⁴²Zal‑laꞌ rac cni, gulayejlëꞌ Jesús bunách zian, len ga bdxintë gulayejlëꞌë Lëꞌ laꞌquëꞌ bönniꞌ uná bëꞌ, san le tádxinëꞌ yuguꞌ bönniꞌ gdauꞌ fariseo, cutu glunëꞌ lnaꞌ lau queëꞌ yalj lulu, cui lubijëꞌ lequëꞌ tsaz ga naꞌ tuꞌdubëꞌ tuꞌsëdëꞌ queëꞌ Dios.

⁴³Cni glunëꞌ le tunrëꞌ zxön le tun lequëꞌ ba laꞌn bunách ca le runëꞌ lequëꞌ ba laꞌn Dios.

⁴⁴Bëꞌë zidzj didzaꞌ Jesús, rnëꞌ: ―Nu bönniꞌ rejlëꞌë nedaꞌ, clëg nedaꞌz rejlëꞌë, san rejlëꞌë caꞌ Xuzaꞌ nasölëꞌë nedaꞌ.

⁴⁵Lëzcaꞌ cni, nu bönniꞌ rléꞌinëꞌ nedaꞌ, rléꞌinëꞌ caꞌ Xuzaꞌ nasölëꞌë nedaꞌ.

⁴⁶Nedaꞌ nacaꞌ yeníꞌ len bidaꞌ yödzlyú ni, cui lugaꞌnëꞌ ga chul xöhuiꞌ yúguꞌtë bönniꞌ laꞌyejlëꞌë nedaꞌ.