Dyan 12:34-46

³⁴Bay tmimel i dad to, manla, “Yé lingemi mdà di uldin Dwata na i Mgalék Dwata nun nawan landè sen. Na kan ku manam na nket fdatah i Ngà To? Simto kè i Ngà To manam ayé?”

³⁵Na tmimel Dyisas fagu di fléd, manan di dale, “Ta là mlo knè i Salò di safédyu. Yé duenam man, di laman magin di gamu i Salò, fadlug gamu magu di knengan fye là gnumah gamu i kifuh, du nè i magu di kifuh, là gadèan i gusalun.

³⁶Taman, fantooyu i Salò di laman mnè di safédyu du fye mgimò gamu dad ton.” Kafnge Dyisas man ayé, mdà kenen salbuni.

³⁷Na balù ku ta dee dad tnikeng nimò Dyisas di kanfe i dad to, knèan là ftoo ale di kenen,

³⁸du fye gdohò i man Isaya, satu tugad i Dwata di munan, “E Amu, simto ta ftoo di ktulenmi i Tnalùam? Simto i ta gufitem i kaltulusam.”

³⁹Na salngad di ta tulen Isaya, là ti gaftoo ale, du manan,

⁴⁰“Ta bnutè Dwata i matala tà ale mite, na ta snafangan i fandamla tà ale galmabat du fye là gsalu ale di do fye fan-gulêgu ale.”

⁴¹Yé duen Isaya man ayé du ta teenan i kdatah Dyisas, na yé tulenan.

⁴²Bay balù ayé, knèan nun dee ganlal i dad Dyu ta ftoo di ku Dyisas, bay mdà di klikòla di dad Farisi, là tulenla dun tàla ale fnang fusuk di gumnè gal gustifun i dad Dyu,

⁴³du yé kayèla i kdag i dad to, ise ku i kdag Dwata.

⁴⁴Na fan-gal Dyisas i talùan, manan, “Nè to ftoo di do, ise ku lo do i fantoon, bay lêan fantoo i mdek do.

⁴⁵Nè to mite do, lêan teen i mdek do.

⁴⁶Do sa i Salò salu dini di tah tanà du fye i to ftoo di do, ta là mnèan di gukmifuhan.