Yaaya 12:34-46

³⁴Gee-ak kaawiiji aman : « Ɗo *gaanuundi, ŋu siir a Masi mataaɗo tak-tak. Kar kiŋke-aŋ gay, maman ki kaawiy a *Roŋ gemor-ak, ŋuu jaalin̰ kuwa. Roŋ gemor-ak, ŋaar waa ? »

³⁵Kar Iisa ɗiyiico aman : « Portikaw goy misa iŋ kuŋko ɗo mena sooɗ di. Jaawoŋ min portikaw goy misa iŋ kuŋko. Jaawoŋ ɗo portikaw paa gondikaw yaako gootiŋko, asaan gem kaak jaawa ɗo gondikor, ŋaar ibanno wer kaak ŋa ɓaayiyo.

³⁶Aaminoŋ ɗo portikaw ɗo wiktin taat ta goy misa iŋ kuŋko. Ansii kat, kuu gine gee ku portikaw. » Min Iisa kaawtu pa-ak, ŋa daktu cigal serek minninco.

³⁷Iisa gin gamin dakina kuuk ajbay ɗo uŋco ka geemir. Kar iŋ taar-an oki, gee bal aamine iŋ ŋaara.

³⁸Maanna-aŋ ko gaara kadar kaaw ta nabi Ezaayi as ɗo botilti aman : « Gem kol *Rabbiney, waa icit kaaw taat ni kaawtu ? Ki gaarit gudurren̰ ɗo waa di ? »

³⁹Ezaayi gaarig pey maan kaak toɗco ɗo geemir a ŋuu aamine iŋ Iisa.

⁴⁰Ŋa kaawtu aman : « Buŋ timincog odinco ho ŋa ginig kaƴco bombo. Ŋa ginig a ŋu talaaɗo iŋ odinco ho diyaaɗo maan ɗo gelbinco. Ampaa ko, ŋu newsiiɗo loci pa ŋaa coolin̰co. »

⁴¹Ezaayi ɗiytu pa-ak, asaan ŋa talit *darjin ta Iisa ho ŋa kaaw biy.

⁴²Iŋ kaaw ta Ezaayi-at, agindaw ku Yuudinnar dakin aamintu iŋ Iisa. Kar gay, ŋu bal gaarin imaanco ɗo geemir, asaan ŋu gina kolaw ɗo Pariziyennar, pa ŋuu atkin̰ min ɗo ger ka salaaner.

⁴³Gee-ak raka a gee yaa elin̰co di. Ɗo tan̰co-at, ŋu tala kadar ele ŋaar-aŋ pakgig kaak asa min ɗo Buŋdi.

⁴⁴Iisa kaawtu raɗa aman : « Ŋaar kaak aamin iŋ nunu, ŋa bal aamine iŋ nun di, ŋa aamin oki iŋ ŋaar kaak tabirintu.

⁴⁵Ho ŋaar kaak talintu, ŋa talig ŋaar kaak tabirintu oki.

⁴⁶Nun kaak portikaw, nu as ɗo duniiner. Ampaa ko, ay gem kaak aamin iŋ nunu goyiyɗo ɗo gondikor.