SAN JUAN 12:34-46

³⁴Jesɨc jém pɨxiñt́am iñɨ́mayyaj jém Jesús: —Tammatoŋne iga nɨmpa jém Dios iŋma̱t́i iga it́pa jém Cristo para it́u̱mpɨy tiempo. ¿Jesɨc t́iiga miñɨmpa iga accaata̱p cunusyucmɨ jém Miññewɨɨp Sɨŋyucmɨ? Anɨ́maayɨ: ¿I̱apaap jém Miññewɨɨp Sɨŋyucmɨ?

³⁵Jesɨc Jesús iñɨ́máypa jeeyaj: —Jém juctɨaŋtso̱ca poy it́ tu̱m rato con mimicht́am. Wit́t́aamɨ iganam it́ jém juctɨaŋtso̱ca iga odoy mictsɨ́yiñ jém piichɨ. Porque jém wit́páppɨc jém piichcɨɨm d́a ijo̱doŋ ju̱t́ nɨcpa.

³⁶Iganam it́pa jém juctɨaŋtso̱ca, jesɨc acupɨctaamɨ aɨch iga iniit́t́ámiñt́im jém juctɨaŋtso̱ca jém íña̱namaŋjo̱m. Jesɨc cuando yaj nɨ̱mi jém Jesús, nɨc iyámáy jém pɨxiñt́am.

³⁷Tsa̱m jáyaŋ milagro y seña iwat Jesús jém pɨxiñt́ámaŋjo̱m, pero jeeyaj d́a icupɨcyajpa iga je jém Cristo.

³⁸Iwatyajpa je̱mpɨc iga cupaguiñ jém aŋma̱t́i jém ijaychacnewɨɨp jém wiñɨcpɨc profeta jém Isaías. Nɨmpa: ManJa̱tuŋ Dios, mich iniŋquejáy jém pɨxiñt́am jém impɨ̱mi, pero d́a i̱ icupɨcpa mich iniŋma̱t́i jém anamiññewɨɨp.

³⁹Jeeyucmɨ jém Israelpɨc pɨxiñt́am d́a icupɨcyajpa jém Cristo, porque nɨmt́im jém Isaías:

⁴⁰Dios icácht́iwatpa jém pɨxiñt́am, ica̱mamwadáy ico̱bac iga mást́im d́a wɨa̱p icutɨɨyɨyyaj jém Dios iŋma̱t́i. Je̱mpam iwat Dios iga jém pɨxiñt́am d́a t́i iixyajpa iixcuymɨ ni d́a wɨa̱p icutɨɨyɨyyaj ia̱namaŋjo̱m iga Dios iwɨ̱wadayt́ooba id́ɨc. D́at́im wɨa̱p ichacyaj jém malopɨc ijɨ̱xi iga Dios iccáyáyiñ it́áŋca.

⁴¹Wɨa̱ iŋmat je̱mpɨc jém Isaías porque wiñɨgam iix jém Cristo ipɨ̱mi. Ijaychacne t́i iñascaaba jém Cristo cuando miñpa yɨ́p naxyucmɨ.

⁴²Pero d́a it́u̱mpɨy jém Israelpɨc pɨxiñt́am cuɨ̱xayaj. Jáyaŋ icupɨcyaj, hasta algunos jém aŋjagooyiyaj icupɨcyajt́im jém Jesús. Pero iga tsa̱m icɨ̱ŋyajpa jém fariseoyaj jesɨc iŋyampa iga icupɨcne. Icɨ̱ŋyajpa iga quebacputyajta̱p jém sinagoga.

⁴³Más iwɨ̱aŋja̱myaj iga cujípyajta̱iñ yɨ́p naxyucmɨ que iga Dios icujíppa.

⁴⁴Jesɨc ocmɨ pɨ̱mi jɨypa jém Jesús. Nɨmpa: —Siiga i̱ acupɨcpa aɨch, jesɨc icupɨcpat́im mex jém anJa̱tuŋ Dios jém acutsatnewɨɨp yɨ́p naxyucmɨ.

⁴⁵Jém aixpáppɨc aɨch, iixpat́im mex jém anJa̱tuŋ Dios jém acutsatnewɨɨp.

⁴⁶Ɨch, jém ajuctɨaŋtso̱ca, amiñ yɨ́p naxyucmɨ iga it́u̱mpɨy jém acupɨcyajpáppɨc aɨch, d́a tsɨ́yyajpa piichcɨɨm.