Juan 12:34-46

³⁴Jira comɨnɨ uai otíaɨoɨ: —Caɨ ocuilla uai cuegánicodo caɨmo llófuega: “Cristo zíiñona iite.” ¿Nɨe izói daɨdɨo: Nanoide Ɨima Jitó tɨtállena caifo raiñóbicaite? ¿Bu mei bie Nanoide Ɨima Jitona? —daɨdíaɨoɨ.

³⁵Jira Jesús daɨde: —Naɨ omoɨ cɨ́gɨri egáiñotɨmɨena izói nano íanori itɨcue. Bie cue egáiñuana ómoɨmo illa dɨno, mai cue llua izói omoɨ macari, jítɨredɨno raɨre omoɨ éidafiñeillena. Jítɨnodo macádɨmɨe ie jáillana onóñede.

³⁶Uzefomo ɨɨno, naɨ ómoɨmo illa dɨno, egáiñogamacɨna daɨí omoɨ jáillena, —daɨde. Afefue daɨna méifodo, Jesús afémacɨmona retáirizaide.

³⁷Jesús íaɨoɨmo eróicana dɨga cɨ́ofɨninafuiaɨna fɨnode. Mei íadɨ íena ɨ́ɨnoñediaɨoɨ.

³⁸Ua ɨ́ɨnoñediaɨoɨ, jaiai uai llóraɨma Isaías Cuegáuai fuitállena. Isaías daɨde: Ocuíraɨma, ¿bu caɨ úrillafue ɨ́ɨnua? ¿Bumo Ocuíraɨma ie rɨ́inona ácatate? daɨde.

³⁹Daɨítana jira ɨ́ɨnonidiaɨoɨ. Ie emódomo jɨáɨfodo Isaías cuete:

⁴⁰Juzíñamui uina cɨ́oiñedɨmacɨna íaɨoɨna fɨnode. Iaɨoɨ ɨfocɨ jáɨaɨtate. Daɨí fɨnode uído cɨ́oñeillena, daje izói ɨfócɨdo ónoñeillena. Jira cuemo bínidɨmacɨ, íaɨoɨ cue jíllotallena.

⁴¹Isaías aféfuiaɨ llote, mei afémɨe Jesús ebírenafuena cɨódeza. Jira afémɨedo úrite.

⁴²Mei íadɨ aillo judíuaɨmona Jesuna ɨ́ɨnotiaɨoɨ, illáɨcomɨnɨmona jɨáɨ dáarie. Mei íadɨ uáfodo lloñédiaɨoɨ, fariséuaɨna jacɨ́ruillano gaɨríracomona jino íaɨoɨ óreñeillena.

⁴³Comɨnɨ ñúefuena íaɨoɨmo nítajana jamánomo gáɨdiaɨoɨ. Mei íadɨ Juzíñamui ñúefuena íaɨoɨmo nítajana jámairuitiaɨoɨ.

⁴⁴Jesús aillo uaido daɨde: —Cuena ɨ́ɨnotɨmɨe, dama cuena ɨ́ɨnoñede, mei íadɨ daje izói cue orédɨmɨena ɨ́ɨnote. Ua cue Moona ɨ́ɨnote.

⁴⁵Cuena cɨódɨmɨe daje izói cue orédɨmɨena cɨode.

⁴⁶Cue egáiñotɨmɨedɨcue. Ana bie énɨemo bitɨcue, cuena ɨ́ɨnotɨno jítɨredɨfomo fɨébiñeillena.