1मिनु येसुमी मेको लोव़ पने थुम्शा, सरीङ गे कोव़शा “आं आफ, आं लची जाक्त, इन सक्ति गेयीनी। मिनु गो इन सक्ति कोंइनुङ।
2गे आं कली मुर नेल्ल आन कली अधिकार पचा गेतीनी। मिनु आं कली गेशो मुर नेल्ल आन कली गेना हना यो ब्रोंइशा बाक्चा गेनुङमी। मत्ती ११:२७
3गेना हना यो गे नु ब्रोंइशा बाक्चा मार बाक्ब देंशा हना, सुमी इन कली गे ला थमा परमप्रभु यावे बाक्नीनी नु गो, इन सोइश्शो येसु ख्रीस्त नङ, दे तुइक्नीमी, मेको ला गेना हना यो गे नु ब्रोंइशा बाक्चा ताइनीम। १यूहन्ना ५:२०
4रागीम बाक्शा, इन पपाइश्शो गेय थुम्शा, इन सक्ति कोंइताक्ङमी।
5आं आफ, रागी सेल्चा क्येङा ङोंइती गे नु इन छेङछेङमी बाक्ती। मुल लेंशा इन बाक्तीक जाक्चा चिक्ताक्ङ। ङोंइती ङा खोदेंशो पा गे नु इन छेङछेङमी बाक्चा गेयीनी। यूहन्ना १:१; फिलिप्पी २:६
6गेमी रागी रे प्रोंइशो मुरपुकी गेतीनी। मेको आन कली इन नें तुइक्पाइक्तामी। मेको मुरपुकी इन के बाक्तेक्म। मिनु गे आं कली गेतीनी। मेकोपुकीमी इन लोव़ टिना टिन बाक्नीम।
7गे आं कली मार मार गेनी, मेको नेल्ल इन के बाक्ब, दे मेकोपुकीमी मुल तुइक्नीम।
8गे आं कली शेंताक्यीनी। मिनु इन शेंशो लोव़ मेको आन कली शेंताक्ङमी। मिनु थमा सुइक्तेक्म। गो इन बाक्तीक रे जाक्शो नङ, दे थमा पा तुइक्नीम। मेकोपुकीमी आं कली सोइक्ब, गे ननी, दे थमा सुइक्तेक्म। यूहन्ना १६:३०
9मिनु गो मेको आन पर्बमी इन कली पुंइनुङ। रागी ङा मुर आन पर्बम मपुंइनुङ। आं कली गेशो मुर आन पर्बम पुंइनुङ। मारदे हना मेकोपुकी इन के नम। यूहन्ना ६:३७,४४
10आं मुर नेल्ल इन के नम। इन के आं के नम। मेकोपुकीमी आं सक्ति कोंइनीम। यूहन्ना १६:१५
11मुल गो रागीमी शुश नाक्त मबाक्नुङ। गे का ला बाक्शो आं आफ, इन बाक्तीक जाक्चशो बाक्नुङ। तन्न मेकोपुकी रागीमी बाक्नीम। आं आफ, आं कली गेशो मुर इन नें ङा सक्तिमी रिम्शो कोव़शा वोतीन। दोपा गो गे नु थुं का ङा बाक्ङा, मोपा मेकोपुकी यो थुं का दुम्शा बाक्मल, दे सक्ति गेने।
12गो आं कली गेशो मुरपुकी नु बाक्ङानु, इन नें ङा सक्तिमी रिम्शो कोव़शा वोइक्तामी। सुइ मजाम्म। इन ब्रेक्पाइश्शो लोव़ थमा दुम्चा, दे का चहिं जाम्शा, नरक लाइब दुम्त। यूहन्ना ६:३९; भजन संग्रह ४१:१०
13मुल गो इन बाक्तीक जाक्चशो बाक्नुङ। इन लोव़ रागीमी शेंताक्ङमी। मारदे शेंताक्ङमी देंशा हना, आं ग्येरशो खोदेंशो पा मेको यो ग्येरसीशा बाक्मल, दे शेंताक्ङमी। यूहन्ना १५:११
14गो मेको आन कली इन देंशो लोव़ शेंताक्ङमी। मिनु रागी ङा मुरपुकीमी मेको आन कली श्येत गेम्तेक्म। मारदे हना रागी ङा मनम। गो यो रागी ङा मनङ। यूहन्ना १५:१९
15मेको आन कली रागी रे प्रोनीन, दे इन कली मपुंइनुङ। तन्न मेको आन कली सैतान रे प्रोनीन, दे पुंइनुङ। मत्ती ६:१३; २थिस्सलोनिकी ३:३
16गो रागी ङा मनङ। मिनु आं खोदेंशो पा मेकोपुकी यो रागी ङा मनम।
17मेको आन कली इन थमा पतीकेमी ख्रुमीन। इन थमा पतीक चहिं इन लोव़ बाक्ब। भजन संग्रह ११०:१६०
18गेमी आं कली रागीमी सोइश्शो खोदेंशो पा, गो यो मेको आन कली रागी रागीम सोइक्ताक्ङमी। यूहन्ना २०:२१
19मेको आन पर्बम गो इन कली जिम्मा गेसीनुङ। मेकोपुकी यो थमा पतीकेमी ख्रुम्शो मुर दुम्शा बाक्मल। हिब्रू १०:१०
20गो मेको आन पर्बम ला इन कली मपुंइनुङ। तन्न मेको आन शेंशो लोव़ रे आं कली थमा सुइक्ब दुम्ब आन पर्बम यो पुंइनुङ। रोमी १०:१७
21मार पुंइनुङ देंशा हना, मेको नेल्ल थुं का ङा दुम्मल। आं आफ, गे आं आगामी बाक्शो नु गो इन आगामी बाक्शो खोदेंशो पा मेकोपुकी इस आगामी बाक्मल, दे पुंइनुङ। मो दुम्त हना, रागी ङा मुरपुकीमी गेमी आं कली सोइक्ताक्नी, दे थमा सुइक्नीम। गलाती ३:२८
22गेमी आं कली गेशो सक्ति मेको आन कली गेतामी। मारदे गेतामी देंशा हना, गो निक्शी थुं का ङा दुम्शो खोदेंशो पा, मेकोपुकी यो गे नु थुं का ङा दुम्मल, दे मेको सक्ति गेतामी। प्रेरित ४:३२
23गो मेको आन आगामी बाक्नुङ। गे आं आगामी बाक्नीनी। मो पा बाक्शोनु, मेकोपुकी गे नु गो खोदेंशो पा का दुम्नीम। मो दुम्शो तशा, रागी ङा मुरपुकीमी गे आं कली सोइक्ताक्नी। मिनु गेमी आं कली दाक्ताक्यीनी। मोपा गेमी आं कली दाक्शो बुदी मेको आन कली यो दाक्ताक्नी, दे तुइक्तमेक्ल। १कोरिन्थी ६:१७
24आं आफ, आं कली गेशो मुरपुकी गो नु काथा बाक्मल, दे पुंइनुङ। गे रागी सेल्चा ङोंइती आं कली दाक्शा, इन सक्ति आं कली गेतीनी। मिनु मेकोपुकीमी यो आं सक्ति तामेक्ल। यूहन्ना १२:२६; हितोपदेस ८:२२-३१
25आं आफ, गे नेल्ल रिम्शो नु ठीक पाइब बाक्नीनी। रागी ङा मुरपुकीमी इन कली मतुइक्नीम। गो चहिं इन कली तुइक्नुङ। मिनु आं शेंसीबपुकीमी गे आं कली सोइक्ताक्यीनी, दे तुइक्नीम।
26गो मेको आन कली इन नें तुइक्पाइक्तामी। मिनु लेंशा तुइक्पाइक्नुङमी। मारदे इन नें तुइक्पाइक्नुङमी देंशा हना, गेमी आं कली दाक्शो खोदेंशो पा इन दाक्तीके मेको आन आगामी बाक्ल। मिनु गो मेको नु आन आगाम बाक्ङल” दे येसुमी परमप्रभु यावे कली पुंइतु।
