Yohannisa 12:34-46

³⁴Asay qasse “Nu wogan xaafetiday ‘Xoossi kiittidadey mernas daana’ gees; Histin ne qasse waanada ‘Asa Nay dhoqu gi kaqqettana bessees’ gay? Ne giza Asa Nay awayssee?” giidi oychida.

³⁵Yesusi istas “Ha7i guutha wodes intenara poo7oy dees; gadey dhumonta poo7ora hammuttite; Qamara hamuttizaddey izi awa bizakkonne erenna.

³⁶Inte poo7o nayta gidana mala poo7oy dishin poo7on ammanite” gides. Yesusi hessa gidappe guye biidi ista ayfeppe geemmides.

³⁷Yesusi istas hessa mala malata ista sinthan ooththinka Ayhudati izan ammanibeetenna.

³⁸Hessi haniday nabe Isayaassi “Godo! Nu markatetha ammaniday oonnee? Xoossa qaalay oonas qoncidee?” gida mala.

³⁹Hessa gish ammananas dandaybetenna; gaasoyka nabe Isayaassi kase,

⁴⁰“Isti ba ayfen beyidi, ba woznan yuushi qoppidi, simmonta malanne izi ista pathonta mala Xoossi ista ayfe qooqisides; ista woznakka muumisides” gi xaafida gishassa.

⁴¹Isayaassi hessa giday Xoossi kiittidade boncho beyida gishassa; Hessa gish Yesusi yootides.

⁴²Gidikkoka Ayhudata halaqatappe daro asay Yesusa ammanides. Gido attin ista Ayhudata Woosa Keeththafe goodonta mala Farsaaweetas babbidi ba ammano qoncen markatibeetenna.

⁴³Isti hessatho haniday istas Xoossafe imettiza bonchofe aaththidi asappe imettiza boncho dosida gishassa.

⁴⁴Yesusi ba qaala dhoqu histidi “Tana ammanizadey tanan xalala gidonta tana kiittidayssanka ammanees.

⁴⁵Tana beyidaddey tana kiittidayssakka beyana.

⁴⁶Tana ammanizay wuri dhuman doonta mala ta poo7o gidada hayssa ha alameza yadis.