34Ol pe hulua nemur te hele, “Imem mo eteia nge lemem hotonga hele ke teke, Kristus i non nenge tu ke koko. Pe pomerei nenge o hele ke o teke, lape te heon heke Non Tuna? Non Tuna mam itei toto ia?”
35Pe Iesus hele lange iri, “Lemenge lape tu luluch nge imo ke mala pol. Pe a esapele lemo inga mur nga etue nenge lemenge tu kura. Pomalam lape kileng au ngana poi hite imo ero. Pe mele nenge ii nga kileng au ngana eteia la nganngana ero.
36Ke nga etue nenge lemenge tu luluch nge imo ke mai, letemo manmanna nge i nike. Pomalam lape a lohot ke imo hehei pe hana nenge tetu manmana nga lemenge.” Iesus hele ke mau ke het pe erue sio mana pe la sapele.
37Iesus hele pe ure halang te lohot mana pe hulua nemur leteria manmanna ero.
38Pe poinga neu te poia ke pete tote hetatalonga Isaias nena helenga mur. “Non Soke, itei hel leteria manmanna nga rera helenga mur? Pe Non Soke hetei hote nena kerkerenga lange itei hel?”
39Leteria manmanna ero iange hetatalonga Isaias hele pule ke teke,
40“NeHalang poia iri ke mataria hit pe poia leteria ke au ala toto. Pomalam te naue iau ero pe leteria mallaha nge iau ero. Pe e hemasia iri ero iange teat nge iau ero.”
41Isaias naue hemalmalinga palaungana nenge Iesus ke ulolo, pomalam heleia Iesus ke pomam.
42Pe hana papalauna nemur, halang nge iri leteria manmanna nge Iesus. Pe te hele hote leteria manmanna ngana ero iange te mataua Paresio mur. Pe pule te matau nge lape tepoi ele iri ke tela nga hetoronga ana pele ero ol.
43Iange hana nemur muteria toto nge te teke hehei pe hana te heto heke totote iri. Pe leteria tu nge NeHalang ero.
44Ol pe Iesus haliu hot ke palaungana toto ke teke, “Mele nenge letena manmanna nge iau, letena manmanna nge iau toro ero. Letena manmanna pule nge i nenge kulosia iau at nei.
45Pe mele nenge esia iau esia i nenge kulosia iau at pule.
46Esio at nga ich nei ke pomanga lemenge. Ke pomalam iri lochloch ngana nenge leteria manmanna nge iau lape tetu nga kileng au ngana ero ol.
Ioanes 12
Ioanes 12:34-46