Yoni 12:34-46

³⁴Piya yogini, wasana aki puma mintume kina'mi igeba maya omintawe: Taeba mono isapipa maya kamana aisuma abune: Karaisiti aeba kampa purinta uwa miyaba mikiyema abuna, kaeba nanaga: Wasanama Ntagara aepa aeguma asaga'yukibewe, yene. We, Wasanama Ntagara aeba kewe, untawe.

³⁵Piya yuguna, Isuba maya kamana a'wae puwaimintiye: Kane e'wasaena aeba abakatipipa uwaena yaganto e'wasa pikiye. Pika tununtanama titikaesanaga yaku e'wasaena wairitantakiri aeti aborama miyiyo. Ka'waina aeba tununtanabi wantanaba kepa kampa agabebe piye.

³⁶Pi kane e'wasaena wairitantika tigutasa pi e'wasaena aega'ma ae tuntana piyo, uwaimintiye. Isu aeba piya kamana uwaimite wama kakama umintantiye.

³⁷Pigoya Isu aeba awame'enaba toma toma uwomantana iyora pogini agantiniba, uwa aetiba kampa aega'ma imatiti potantawe.

³⁸Pipa poropete yagara Aisaya ae kamana'ama esegi penema piya puntawe: Aeba kamana mayama kaentiye: Wa'ega, kawaga kamanaka yokanaba, ke abibebeba piye, iye. Pipa Wa'egawamatisa esegiyena ke ayakegana napiyema, kaentiye.

³⁹Piya, igeba iyorika pumagini, Isu kamanapa kampa aogima abibebe puntawe. Pipa Aisaya kamana mono isapi ka waintomeka puntane. Pipa mayamawe:

⁴⁰Kotiba iyo atikaewaigasima igu'amapa akumpa yaba kanta puwaitantine, iye. Piya pogini, igeba a'ya'waemaenaba kampa agama napibebe puntane, iye.

⁴¹Igupa a'wae pigi aogi pusanaga akumpa puwaitantine, untiye. Aisaya pi kamana Isuka untipa ae e'wasaenawa agantana untiye.

⁴²Pigoya ka'isa monota paitanta kina'miba Isupa igu kayone potantini, pigo: Parasi kina'miba mono a'a-o uratama tagarubakibewe, uma iyekuru puma kakantawe.

⁴³Piya, Igeba Kotiba ige'wai maema asaga'yusanagaba kampa ibuntiye. Igeba wasanami ige'wai maema asaga'yuwaitasanaga tabera ibugaogini iyekuru puma kakantawe.

⁴⁴Pigoya, Isuba kega'e uma maya untiye: Ka'waina aeba naega'ma amatiti punatakibipa, aeba nae nabiba kampaye. Unatanti'na aeke kaga aega'ma amatiti potakiye, untiye.

⁴⁵Piya, ka'waina aeba nae ka nagai'naba unatanti'na aepe kaga agaye.

⁴⁶Piya, e'wasaena naeba mampabi tumintone. Ka'waina aeba naega'ma amatiti pikibi'naba tununtanabipa kampa miyaba mikiye, untiye.