SAN JUAN 12:34-46

³⁴Jaun₂ ca₂ŋag₃ dsa₂: ―Ma₂néi₂ jnia'₅₄ a₂'ɨ₅ dsa₂ ne₄ Si₂ 'Éi'₃ a₂juá'₂ a₂le₃chan₂ I₂rë₂'ɨ́n₁ quián₅ Diú₄ co₂tan₅₄. ¿'A₂ guë'₂ lia'₂ juá'₂ 'ne₂ tion₅₄ chón'₂ dsa₂ Jaun₅ dsa₂ mɨ₂güɨ́g₃? ¿'Ein₂ 'éi₂ i₂lɨ́n₅ Jaun₅ dsa₂ mɨ₂güɨ́g₃?

³⁵Jaun₂ në́₃ ca₂juá'₂ Jesús: ―Jŋia'₅₄ lia'₂ co₂'na₂ bá₄ tág₅ guë́₄ si₂ jɨn'₄ 'nia'₂. La₁ i₂nio'₄ 'nia'₂ të₁lia'₂ tág₅ si₂, con'₂ tsá₃ ŋó₅ në₁jua'₂ ca₂tó'₂ nei₂. Ia₁ juɨ₁lia'₂ dsa₂ i₂ŋɨ₅ jë₄ qui₁né'₃, tsá₃ ŋi₅ 'a₂ juɨ₅ dsó₃.

³⁶Juɨ₁le₂'én'₂ 'nia'₂ le₃quió'₅ si₂, të₁lia'₂ cha₂ si₂ jɨn'₄ 'nia'₂, ia₁jaun₂ lén'₂ 'nia'₂ dsa₂ quián₅ si₂. Jme₁ca₂dsan₃ juá'₂ Jesús le₂në₅, ŋái'₃, jaun₂ ca₂'mai₃ ja₁con₂ dsa₂ 'éi₂.

³⁷La₁ juɨ₁'a₂ guë́₃ la₂ ca₂jmo₃ Jesús 'lióng₂ léi₄ ne₄ dsa₂ 'éi₂, tsá₃ ca₂rë₃'én₂ bá₄ guë́₄ dsa₂ 'éi₂ le₃quió'₅.

³⁸Le₂në₅ ca₂rë₃ti₃ jág₁ a₂ca₂'ë́₂ Isaías o₄quió'₄ Diú₄, jme₁ca₂juá'₂: Te₁gui'₅₄, ¿'ein₂ ma₂ca₂rë₃'én₂ jág₁ a₂'ë́₅ jniog₄? ¿Ja₁con₂ 'ein₂ ma₂ca₂jme₃jnia₅ Te₁gui'₅₄ juɨ₅bí₂ quió'₅?

³⁹'Uɨg₅₄ jaun₂ tsá₃ lé₂ le₃'én₂ dsa₂ 'éi₂, ia₁ con'₂ siá'₂ ca₂juá'₂ táng₃ Isaías:

⁴⁰“Ma₂ca₂jmo₃ Diú₄ a₂tén₂ dsa₂ 'éi₂, a₂ca₂lë₃ cang₄ dsi₅₄ në́₃, ia₁jaun₂ tsá₃ jág₃ quian'₅₄ mɨ₂ne₅₄, on₃ guë'₂ le₂ŋɨ́i'₂ të₂le₃ të₂dsɨ́₅, on₃ guë'₂ qui₃jéin'₃ dsɨ́₅, ia₁jaun₂ jme₁'lioin₁₂ jniá₂.”

⁴¹Ca₂juá'₂ Isaías le₂në₅ ia₁ ca₂jág₃ le₂jŋiá₅ juɨ₅bí₂ jlá'₁ quió'₅ Jesús, jaun₂ ca₂dsia₃ 'ɨin₂₃ 'éi₂.

⁴²La₁ia₁ tion₅₄ bá₄ ca₂rë₃'én₂ dsa₂, le₂jiog₅ bá₄ i₂lɨn₅₄ dsa₂ can'₅₄. La₁ tsá₃ ca₂jmo₃ jág₁, ia₁ a₂gó'₅ gain₃ dsa₂ fariseos, con'₂ tsá₃ ŋó₅ në₁jua'₂ ca₂'uág'₂ dsa₂ quió'₅, ja₁le₁toin₂₃ ne₄ si₂ guá'₅ sinagoga.

⁴³Ia₁ a₂'nio₃ guë́₄ të₃tsɨin'₅₄ dse₃ quian'₅₄ dsa₂ mɨ₂güɨ́g₃, lia'₂ con'₂ guë́₄ a₂jme₁të₃tsɨin'₅₄ dse₃ quian'₅₄ Diú₄.

⁴⁴Ca₂juá'₂ Jesús jág₁ tiá₂: ―Juɨ₁lia'₂ i₂'én₂ të₂le₃ quió₃ jniá₂, on₃jua'₅₄ jmá'₃ le₃quió₃ jniá₂ 'éin₂; ján₃ bá₄ 'éin₂ le₃quió'₅ Ŋe'₃ i₂ca₂chei₃ jniá₂.

⁴⁵Juɨ₁lia'₂ i₂jág₂ jniá₂, jɨ́in₂ i₂ca₂chei₃ jniá₂.

⁴⁶Ma₂guan₅ jniá₂ mɨ₂güɨ́g₃ la₂, a₂lɨ́ng₅ si₂, ia₁jaun₂ i₂'én₂ të₂le₃ quió₃ jniá₂, tsá₃ të₃'ŋiái₄ jë₄ qui₁né'₃.