João 12:34-46

³⁴Atonlobyry modo aguelymo: — Niguewâpyra ise Messias, tâkezema kâzewenry iweniby wâgâ. Aunloenlâ ise awâkâ Deus Ingonotyby, tâkeze warâ. “Urâ Uguondo Kaynâpa Âetyby yiguehoem kruz onwa âiehoze urâ” mygueaki olâ. Messiaslâ âmâ-ro watay, âdaituo pylâka “Igueze urâ” myguely? — kelymo.

³⁵Aituo Jesus in-hoguly: — Kydadakobâdo tâense wâne kydaze peto oday, myara ise Deus ize ato ara adâjidyly inomedâdomobyry mâuntulymo. Yeinwântaungâ, yeinwântomo nhuduly umelâ. Âdiempa kulâ ise agâmo wawyly. Yeinwântaungâ, iamu odaxi âsenagazeze mydâpa mitomoem. Iamu oday adakobâni modo wâne âdyam tâtâly nepyra, myara ise awâkâ yeinwântânry modo tâsenagazedoam tâtâly nutubamo awyly.

³⁶Agâmo wataylâ, auguely einwântaungâ. Arâ ise peto oday adakobâni ara mawylymo — kely. Agueypyem Jesus târâpa âxiguely, kurâdo tâempyra itoem.

³⁷Jesus aidyly tâensemo lelâlâ wâne myakâwâm, arâlâ olâ agui judeu domodo neinwâmpyra awylymo.

³⁸Saguhoem Deus wâgâ agueypy Isaías aguehobyry ara kehoem aidyly: “Deus, agui kurâdoram xina âtaumbyry negatu, aguipa kulâ olâ keankâ xina aguehobyry einwânni. Tâensemo lelâlâ wâne toenzepa on-honrugue amânhetyby, aguipa kulâ olâ âinwânni modo” kely iweniwâm Isaías.

³⁹Deus izepa tawylymogue neinwâmpyra awylymo. Saguhoem Isaías inwenihobyry ara iwerâ aidyly:

⁴⁰“Deuslâ mawânkâ tienkyly modo nutuba itomoem aienehonrim, nhangahumo nhuanwanâdyly waunlo ara. Warâ neinwâmpyra awylymo, Deus ton-honru tânehonzelâ wâne, Tytaumbyry nhegatuen-hoymby nidadâmolâ wâne warâ. Tâinwânsemo wâne watay, tâsemaguezemo tâise” kely Isaías.

⁴¹Deus, Jesus wâgâ aitaynrim modo nhenehonduo, mâkâ arâ inwenily. Awylygue arâ Jesus wâgâ inwenily.

⁴²Agui myani judeu iwymârydo Jesus einwânni modo, ânguyram negatubamo olâ myakâwâm. Fariseu domodo tâdâtâdyguyhoam tâkaunâbyra awyly nhytaguylymo.

⁴³Kurâ domodo kulâ tohoguedyze atomo, Deus keba tohogueniem ize atomo.

⁴⁴Ton-honre kehoem Jesus aguely: — Urâ kulelâ inkâba yeinwânni modo nheinwânkyly, mâkâ ugononibyry lâpylâ warâ.

⁴⁵Utuwâni modo ugononibyry tutuzemo lâpylâ.

⁴⁶Urâ iajimanâni emyenro xirâ onro anaxi kâewyly, yeinwânni modo Deus itaumbyry nhutuhomoem. Kâewyly ani, yeinwânni modo iamu odaypa iese.