Yuhanna 12:34-46

³⁴Yimɓe ɓee njaabii mo: —Sariya oo anndinii min Almasiihu yo duumotooɗo. Hono aan mbiirataa kinaa Ɓii Neɗɗo oo toownee? Homo woni oo Ɓii Neɗɗo?

³⁵Iisaa jaabii ɓe: —Fooyre ana wondi e mon wakkati seeɗa tafon. Njahon gila fooyre ana heddii e mon, pati nimre hippoo on. Jahoowo ley nimre anndaa ɗo yahata.

³⁶Ngoonɗinee fooyre gila ende e mon yalla oɗon laatoo yimɓe fooyre. Iisaa haalu ɗum tan, yehi suuɗoyii ɓe.

³⁷Kaayɗe ɗe o waɗi yeeso maɓɓe ɗee fuu, waɗaali so ɓe ngoonɗini mo,

³⁸yalla haala annabi Esaaya kaa ana tabita: «Joomiraaɗo, homo goonɗini waaju amen oo? Homo ɓannginanaa baawɗe Joomiraaɗo?»

³⁹Ɓe mbaawaano goonɗinde, sabi Esaaya wii kasen:

⁴⁰«O wumnii gite maɓɓe, o helii hakkillaaji maɓɓe, pati gite maɓɓe njiya, pati hakkillaaji maɓɓe paama sako ɓe tuuba, so mi sellina ɓe.»

⁴¹Ɗum Esaaya wii nde yiinoo teddeengal Iisaa, so haali haala makko ndee.

⁴²Kaa ɗum fuu e taweede, hooreeɓe Yahuudiyankooɓe heewɓe ngoonɗinii Iisaa. Kaa saabe Farisa'en, ɓe kulii yaadirde pati ɓe njaltinee waajordu.

⁴³Ɗum woni teddineede yimɓe ɓurani ɓe teddineede Laamɗo.

⁴⁴Iisaa haali faa toowi, wii: —Goonɗinɗo kam, wanaa miin tan o goonɗini, nelɗo kam oo duu o goonɗinii ɗum.

⁴⁵Neɗɗo fuu jiiɗo kam, yii nelɗo kam oo.

⁴⁶Miin, mi warii mi fooyre aduna oo, faa goonɗinɗo kam fuu pati heddoo ley nimre.