YOWAANA 12:34-46

³⁴Mbooloo ma ne ko: «Jàng nanu ci sunu téereb yoon ne, Almasi bi dina sax ba fàww. Kon yaw, nan nga mana waxe ne: “Doomu nit ki dina yékkatiku?” Kuy Doomu nit kooku?»

³⁵Yeesu ne leen: «Leer gi dootul yàgg ak yéen. Doxleen, ci bi ngeen dee am leer, ngir lëndëm bañ leena bett. Ndaxte kuy dox ci lëndëm doo xam foo jëm.

³⁶Kon ci bi ngeen dee am leer gi, gëmleen ko, ngir ngeen doon doomi leer.» Bi mu waxee loolu ba noppi, Yeesu dafa dem, nëbbatuji leen.

³⁷Firnde yi mu leen won yépp taxul ñu gëm ko,

³⁸ngir li yonent Yàlla Esayi waxoon am: «Boroom bi, ana ku gëm sunu waare? Kan la Boroom bi won dooleem?»

³⁹Manuñu woona gëm, ndaxte Esayi dafa waxaat ne:

⁴⁰«Yàlla dafa gumbaal seeni bët, def ba ñu dëgër bopp, ngir seeni bët baña gis, seen xel baña xam, ñu baña waññiku ci man ngir ma wéral leen.»

⁴¹Esayi dafa wax loolu, ndaxte gisoon na ndamu Yeesu te mi ngi doon wax ci ay mbiram.

⁴²Fekk na ci biir njiit yi sax, ñu bare gëmoon nañu Yeesu, waaye Farisen yee tax fésaluñu ko, ndaxte dañoo ragaloon, ñu dàq leen ca jàngu ba.

⁴³Ngërëmu nit a leen gënaloon ngërëmu Yàlla.

⁴⁴Yeesu yégle ne: «Ku ma gëm, gëmuloo ma waaye gëm nga ki ma yónni.

⁴⁵Ku ma gis, gis nga ki ma yónni.

⁴⁶Ni ag leer laa wàcce ci àddina, ngir ku ma gëm du des ci lëndëm.