Ioane 12:34-46

³⁴Rà ina têe ê pâ âboro pâ: «Ina naa na pâ tii goro *Naèà pâ wà pwi *Mesia, âna é nye tà wâro dàra gòiri awé. Â cina gà ina pâ, o wâdé naa naatoo géeni gòropuu wà Pwina naîri âboro? Â gére wàilàapà ê Pwina naîri âboro bèepwiri?»

³⁵Â é tòpi tàra pâ: «O jèe càcaa tà gòiri, na bwaa tà tâa jaawà i pwéelaa. Â wâdé na guwà pâra, ûna é bwaa tâa jaawà, ba na o câé caa papòwà ê bàutê. Ba wà pwi âboro na é pâra na ê bàutê, âna câé caa tâmogòori wâna na é pâ naawê.

³⁶Tòpi ê pwéelaa, ûna é bwaa tâa jaawà, ba na guwà tèpa âboro kâra pwéelaa.» Ûna é ina pwiri wà Iésu, â é pâra jiirà, â é picârü goorà.

³⁷Wâru pâ *câmu kâra pàtàma Pwiduée na é pwa wà Iésu, na ara tèpa Juif. Êco na càcaa wâru tàpé na rà cèikî naa gooé.

³⁸Â jèe coo ê popai na é ina biu wà Isaia, pwi *péroféta, pâ: Pwi Ukai, Pwiduée, wàilàapà na cèikî naa goo popai kâbà? Gà paari tâî pàtàma'gà ma nii'gà? Ésaïe 53.1

³⁹Â o pwacoé mwara ma rà cèikî, ba é jèe nabwé ina wà Isaia, pâ:

⁴⁰Âraporomeerà na bwi; pwâranümarà na gòo. Ba wakè kà Pwi Ukai —Pwi Ukai Pwiduée na nama rà wàrapwiri. Ba péa rà biirà, ma medarié côwâ. Péa nama tiàu pâ maagé kâra Ba. Ésaïe 6.10

⁴¹É ina pwiri wà Isaia goo Iésu, ba é jèe tàmara côo ê pai maina ma muugère kêe.

⁴²Êco na pwa pàra tàpé na rà cèikî naa gooé, tiagoo pàra tèpa pitûâ kà tèpa Juif mwara. Caapwi co na càra caa inapàparirà, ba wâgotàra goo tèpa Farasaio. Ba rà péa pacòobérà gée na *wâra pitapitiri.

⁴³Ba wâdé tàra, ê pai pwamainarà kà tèpa âboro, jii ê pai pwamainarà kà Pwiduée.

⁴⁴É tomara too wà Iésu pâ: «Wà pwina é cèikî naa gooò, âna câé caa cèikî naa gooò co, â é cèikî mwara naa goo Pwina é cùruo me.

⁴⁵Â wà pwi âboro na é côoô, âna é côo mwara Pwina é cùruo me.

⁴⁶Wâgo, âna go pwi pwéelaa, na go me naa na gòropuu, ba na câé caa tâa na bàutê cè pwi jèpwi cèna é cèikî naa gooò.