Yahaya 12:34-46

³⁴Kakuma̱ ki ka danai, “Mele ma tsunu ma tonuko tsu ta̱ Kawauwi ka rongo ta̱ n uma hal ubana. Niɗa va dana a ka ꞌya̱nga̱sa̱ ta̱ Maku ma Vuma a zuba u mawandamgbani? Ya Maku ma Vuma mi?”

³⁵Yesu wushuki, “Ya tsa̱ra̱ ta̱ katyashi aꞌayin kenu. Rongoi a nwalu aꞌayin a ɗa iꞌa̱ri a katyashi, tsa̱ra̱ i ta̱ɗa̱tsa̱ wa aꞌayin a ɗa baci karimbi ka danda ɗa̱. Shegai ya wala baci a karimbi, ya fuɗa ya reve asu u ɗa ya bana wa.

³⁶Wushuki n uza ɗa u tsu zuwa katyashi ka tuwa̱ tun wa̱ri kaɓolo n a̱ɗa̱, tsa̱ra̱ i woko aza ɗa a aꞌa̱ri a katyashi.” An Yesu danai nala, aku u lazai u ba u kpawain tsa̱ra̱ a wene yi wa.

³⁷Ko an u wokoi u yansai ikunesavu a kapala ka le, a wushuku n eyi wa.

³⁸Nala gita̱ ta̱ tsa̱ra̱ ili iꞌya Ishaya matsumate u danai i shaɗangu, “Magono ma Zuba, ya wushuki n ili iꞌya tsu danai? Magono ma Zuba, ya vu wenikei ucira u vunu?”

³⁹Matsumate mi ma doku ta̱ ma danai, ili iꞌya i zuwai a kpa̱ɗa̱i uwushuku iꞌya na:

⁴⁰“Magono ma Zuba ma zuwa ta̱ aꞌeshi a ama yi a rumba̱na̱i, kpam u zuwa le a ryagbajai. Mpa Magono ma Zuba, n yan ta̱ nala tsa̱ra̱ a wene ko a reve wa, kpam kotsu a kpatala utuwa̱ ara va̱, tsa̱ra̱ n ta̱na̱sa̱ le wa.”

⁴¹Matsumate mi ma dana ta̱ nala kpaci u wene ta̱ tsupige tsu Yesu, kpam u dansai ukuna u ne.

⁴²Aꞌayin a nala yi, azapige ushani a wushuku ta̱ n eyi. Shegai an a ka pana uwonvo u Afarishi, a kawan a dansa u ɗa a kateshe wa, kotsu a wutukpa̱ le a asuvu a kagata ka Kashila̱ wa.

⁴³A tsu la ta̱ uciga icikpali i ama kapala n icikpali i Kashila̱.

⁴⁴Yesu ꞌya̱nga̱sa̱i kala̱ga̱tsu ka ne u danai, “Gba̱ uza ɗa baci dem u wushuki na̱ mpa, na̱ mpa ɗa koshi u wushuku wa, hal dem n uza ɗa u suku mu ɗa u wushuki.

⁴⁵Uza ɗa kpam u wene mu, u wene ta̱ dem uza ɗa u suku mu.

⁴⁶N tuwa̱ ta̱ a likimba n woko katyashi, tsa̱ra̱ uza ɗa baci dem u wushuki na̱ mpa u rongo a asuvu a karimbi wa.