San Juan 12:34-46

³⁴Badxiꞌ ree bén guinan rëb reeman: ―Dunujn rayagbee rëb loj ley, Cristo guiban tiblayaa. ¿Chexc zeel nal, rayal guilies reeman Bén zëëd xanyabaa? ¿Chunin na̱j Bén zëëd xanyabaa?

³⁵Rëb Jesús loj reeman: ―Ad zien dxejtri sunë bajl guie lëjt. Gol guza laꞌtgaj zaꞌnëdi bajl guie, chitëë guiniaaz guiaal lëjt. Din bén rza loj xcay, ad ragbeetaman ban cheman.

³⁶Gol bililadx bajl guie, laꞌtgaj zaꞌnëdan, din gaquidi xbejnan. Chi gulox gunee Jesús zian, dxel baquieꞌchlojman loj reeman.

³⁷Majsi been Jesús zien daꞌt milagr baguiaa reeman, ad bililadxt reeman.

³⁸Zian gojc cumplid ni bacaa Isaías bén badëë xtiidx Dios loj ree bejn, rëban: Dad, ¿chu ma bililadx ruson radëëdan? ¿Chu loj ma balüü Dios xguialrniabeeman?

³⁹Zianan zeel ad gojct nililadx reeman, din në ze bacaa Isaías:

⁴⁰Dios basiaaw guiaaloj reeman, bascajy tëëman xquiarguiejn reeman, chitëë guguiaa reeman chigniaꞌ tëë reeman, chitëë yadxiꞌ loj reeman lon, abiꞌ ad zayüntan laa reeman.

⁴¹Rëb Isaías zian guial baguiaaman xbiani Jesús, zeel bazaꞌtaman laaman.

⁴²Per niꞌczi zian, dád zien ree bén zojbloj bililadx Jesús. Per ad rëbt reeman loj ree bejn zian, guial rdxeb reeman yabëë ree bénfarisew laa reeman lod ricaagdiajg reeman xtiidx Dios,

⁴³din mazri rën reeman guiën ree bejn laa reeman, guial guiën Dios laa reeman.

⁴⁴Gunee Jesús rejs rëbaman: ―Bén rliladx naj, ad najtzan rliladxaman, në da Dadan bén guxhaal naj.

⁴⁵Bén ruguiaa naj, në bén guxhaal naj ruguiaaman.

⁴⁶Naj na̱j bajl, bialan loj guidxliuj guie, chitëë yayaꞌn ree bén rliladx naj loj xcay.