SAN JUAN 12:34-46

³⁴Ra̱hn ihyan chahn ri ye ihyan: ―A devano nuhn te na̱n Ndudo yahn Dendiohs ne, a ndirun che ihyan che a va ca̱de che chi ye ndedevahn ye ihyan iyehnse ne, hua nda̱ ro che cuihno vederihquentiyon yahn ye. ¿Ta̱ca̱ che ra̱hn ne che ndih che rinduco ne nducoya̱ca ihyan, conan ya̱h ne? ¿Duh ndih tuhme ne?

³⁵Tuhme ra̱hn Dihvo vo ri ye ihyan chahn: ―Conan cá te neve ro nduco nchuhn, cacuáhn nchuhn. Cuihcovan ne ndudo yáhn, ca̱va che runeca̱de cuahtechica ne, ne co ndevahn ne, te ihyan che hua runeca̱de vatechica ye ne, nde hua devano ye ti nda̱ ti tuno ye.

³⁶Cuitahno nchuhn u, numanahn che quenán nduco ne, ca̱va che co ne ihyan runeca̱de. Chihno ra̱hn Dihvo vo chemin ne, chihcoma̱n ye ihyan chahn, ne cuahn ye.

³⁷Andahre a̱ma din Dihvo vo vederihno va̱n ihyan chahn ne, hua chitahno ye ihyan.

³⁸Hua chitahno ye, te va che conahn nduco ye, nduhca̱ che dirun ihyan profeta Isaías tuhca̱: Dihvé, neve cuahn ra ihyan che ritahno ye ndudo che rahndudo nuhn. Neve cuahn ra ihyan che tumacadino ye vederihquentiyon yahn ne.

³⁹Tihca̱ chi che hua chi chitahno ihyan chahn. Namin dirun ihyan profeta Isaías tuhca̱:

⁴⁰Dendiohs ne, deche ye ndutina̱n ihyan chahn ma̱n, din cheche ye chedave yahn ye ma̱n, ca̱va che hua nchana̱n ye ma̱n, hua conahn ye ma̱n, ne hua cotahno ye Dihvo vo, ndevahn ye.

⁴¹Tihca̱ dirun ihyan profeta Isaías yahn vederihquentiyon chahte yahn Dihvo vo, te chinahn a̱ma vederihno nduco ye, ndihchero ye vederihquentiyon min.

⁴²Andahre tihca̱ ne, a̱ma ya̱hn ihyan nación yahn Israel chitahno ye Dihvo vo. Nde sa̱hn ndina̱n chahn, chitahno neve se. Ate hua chihco ro se che ritahno se ihyan, yahn che va̱h se che cahnevi sa̱hn fariseo chahn vederihquentiyon yahn se chete ya̱co.

⁴³Hua chihco ro se che ritahno se Dihvo vo, te tahque renan ino se che quenda̱h yavena̱n se na̱n ihyan iyehnse che co na̱n Dendiohs.

⁴⁴A̱ma yune cuahn che rahndudo Dihvo vo ne, a̱ma dito ra̱hn ye: ―Ihyan che ritahno ye u ne, namin ritahno ye Dendiohs Chida, ihyan min che dechuh ye u.

⁴⁵Ihyan che rendihche ye u ne, retumacadino ye ta̱ca̱ ihyan min.

⁴⁶U ne, ndá̱ muhn iyehnse, ricuáhn Ndudo yahn Dendiohs, ca̱va che ihyan che cotahno ye u ne, ndevahn ye, ne runeca̱de cuahtenan ye.