Yuhanis 12:34-46

³⁴Hidi kon atuil in se la ngas ketan noan, “Kaim ming net se Ama Lamtua Atorang nga noan, mam Kristus nuli napiut. Tiata tasao le Tuang aa noan, ‘Mam oen tao Atuling Baktetebes si holtiu se kai sangsuli lu lia?’ Hidim Atuling Baktetebes sa na mo, asii la?”

³⁵Kon Yesus situs noan, “Nesang lo ka kam, Auk langa ki kaloe se mi pait lo ka. Tiata se oras Auk in muik nabale kia lam, mi musti nuil lo-lolo, le halin daat ta tung kele langa man in ne mi dalen na ngas deken. Ta atuil in laok se mitang dalen na ka, taan le un laok bus el ola ka lo.

³⁶Tiata eta Auk langa ki muik nabale lam, mi musti parsai se Au, le mi daid atuil in nuil se langa ka, halin laok elola lam, mi tanan.” Yesus aa hidi ela kon, Un hoen apa ka deng atuil hut mamo kas, le halin Un sii.

³⁷Yesus tao taad herang mamo son, se atuli hut mamo kas silan, mo oen dai parsai Un lo nabale.

³⁸Na banansila el Ama Lamtua mee-baah Yesaya la in tek son noan, “Tuang nge! Muik atuli parsai kaim in aa ngias lo! Ta Tuang tulu Tuang in kuasa ka son kon no, atuli las ngat no-nole lo kon!”

³⁹Undeng na, le halas ni atuil Yahudi tenga las parsai nal se Ama Lamtua lo, banansila el Yesaya in dula mes didang pait, man noan,

⁴⁰“Ama Lamtua Allah tao oen matan nas le tedos, halin oen haup in neta pait deken. Un nang le oen dalen nas didi, halin oen nangan taan batur lo. Nang le oen ela, halin oen bali maa nuting Auk deken, nol Auk tao banan oen pait deken.”

⁴¹Yesaya aa ela, undeng un net Yesus in uhu ka son, tiata un kon dehet meman deng Yesus.

⁴²Nol muik atuli mamo parsai se Yesus. Atuil biasa li sii tuun lo, ta muik tene-tene deng atuil Yahudi las tenga ka kon parsai se Yesus. Mo oen hao Yesus se atuil hut mamo kas silan lo, lole oen lii, ta tamlom atuil Farisi las nulut puting oen deng um in kohe-kanas sas sa.

⁴³Undeng atuil Farisi las nol atuil Yahudi las tene-tenen deeh in koma ka le, haup in naka deng atuli lia, mo deng Ama Lamtua Allah lo.

⁴⁴Kon Yesus aa nol fala mumuun noan, “Atuil in parsai Au ka, parsai Auk siing lo, molam parsai nol Una man in nutus Au ka kon.

⁴⁵Eta asii man net Auk son nam, un kon net Ama man in nutus Au ka son na.

⁴⁶Auk maang le daid banansila el langa se apan-kloma kia. Le halin atuil in parsai se Au ngas totoang nulis se mitang-mames dalen lo.