Ioanes 12:34-46

³⁴A kor na tarai dia bali ia dari: Ave ga valongore ta ra tinata na varkurai ba ra Kristo na laun tukum; ma dave go u tatike ba: Da vatur Natu i ra tutana urama? To ia go ra Natu i ra tutana?

³⁵Iesu i biti ta diat: A ik ika boko ra kapa i ki pire vavat. Avat a vanavana ba ra kapa i ki boko pire vavat, kan ra bobotoi na tadav avat; nam i vanavana ta ra bobotoi, pa i nunure ba i vana uve.

³⁶Ba ra kapa i ki boko pire vavat, avat a nurnur ta ra kapa, upi avat a umana natu i ra kapa. Iesu i tatike vue go ra lavur magit, ma i vana, i parau kan diat.

³⁷Ma go i tar pait mangoro na vakilang ta ra mata i diat, ma pa dia nurnur tana;

³⁸upi na da nam ra tinata Iesaia i ga tatike dari: “Luluai, to ia i ga valongore kaveve varveai? Ma di ga ve tar ra lima i ra Luluai tai ia?”

³⁹Go ra vuna pa dia ga nurnur tana, tago Iesaia i ga tatike bula:

⁴⁰“I ga vapula bat ra kiau na mata i diat, ma i ga valeo ra bala i diat; Kan diat a gigira ma ra ura kiau na mata i diat, ma kan diat a matoto ma ra bala i diat. Ma diat a vana tapuku, Ma ina valagar pa diat.”

⁴¹Iesaia i ga tatike go ra lavur magit, tago i ga gire kana minamar; ma i ga varvai ure.

⁴²Ma mangoro ta diat ra lavur tena varkurai dia nurnur tana; ma pa dia tata kapa ure, tago kan ra lavur Parisaio diat a okole vue diat kan ra pal na lotu;

⁴³tago dia manga mainge ra variru tai ra tarai, ma tai God i ikilik ika.

⁴⁴Ma Iesu i oraoro, i biti: Nina i nurnur tagu, pa i nurnur tagu, i nurnur ta nam i ga tulue iau Uti.

⁴⁵Ma nina i giragire iau, i giragire bula nam i ga tulue iau uti.

⁴⁶Iau a kapa, iau tar vana rikai ta ra rakarakan a gunagunan, upi nina i nurnur tagu, koko na ki ta ra bobotoi.