Jon 12:34-46

³⁴Te we bidi augwaligo Jisasbolo po wei ponoyu, te po wai, “Dago bomo yai pode tama po elalubo dao, Godigo sa muyu, asaiba wali bidi Krais aga bidada peyu, bidada paibao, te po wai. Tama tibaso, magi baso nago te po obawe, augwaligo te Godigo Bidi Mu ugwaba sao, po wai. Te Godigo Bidi Mu wali te de dawe?” augwaligo te po wai.

³⁵Tama Jisasgo augwalibolo te po wai, “Dwasianu sogo me te ula dage dali bidaibao. Te hulia sabo dageba asidali weyu, megi dagego te ula elalubo si, te ulade dage bidao. Te hulide pabo bidi aga mena pabowe te agai konegobeo.

³⁶Megi ula dagede elalubao. Tama tibaso, duga homu tigidali te ulaba muao. Tama tilama, dage te ula tiwai pedalama, bidaibao,” Jisasgo te po augwalibolo wai. Jisasgo te po olama, tama agai augwali taga peyu, geme duala sigi pai.

³⁷Agai yali bomai sę hauwa augwaligo suali goli, augwaligo agabolo homu dąų olama mubeo.

³⁸Magi basowe? Polobadu Godigo nosali yabo sę po ola mani profet bidi nogi Aisaia, agai asęani po usu numainogo yai. Aisaiago polobadu te po wai, “Genuai Bidi, dago wali po mena bidigo aga homu te poba mubowe? Bidi menio. Tama Genuai Bidigo aga bomo yai sę yali goli te bidi mego te homu teba me mubeo,” Aisaiago te po asęani.

³⁹Tama te we bidi augwaligo homu Jisasba mubo usu egobeo. Magi basowe? Po me Aisaiago asęani, e dao,

⁴⁰“‘Augwaligo homu begelegi sogo da, teda eno augwali usu ma iligi da,’ Godigo te po wai. Tialima, augwaligo gedugo sulama, homugo koneidali weyu, Godigo augwaligo gedu haluai dao. Agai augwali te homu tomoba masigi sąwai gagawai we bidi ilali,” Aisaiago te po polobadu asęani.

⁴¹Aisaiago Jisasgo nosali sabo moni bomo suyu, agai moni nogi po odoyu yai dao. Tama tibaso Aisaiago agade te po asęani.

⁴²Te Juda bage augwaligo Jisasgo yali bomai sę suali goli, augwaligo agabolo homu tigidali mubeo. Tiali digi, Juda bage tobolu bidi hauwa augwaligo agabolo augwa homu muai. Tialima, augwali te Farisi bage dali wi eyu, augwaligo augwa homu Jisasbolo muani po gasa bidibolo hanilama te po wabeo. Farisi bagego augwali te bomo yai po ola mabo be tomoba asobo habu selidali weyu, augwaligo gasa bidibolo te po pusubeo.

⁴³Augwaligo te homu yai, ‘Bidi dabego dabolo “Dage dwagi yai bage dao,” obaso, te usu dao, te genuai dao. Te Godigo naga dabolo “Dage dwagi yai bidi dao,” obaso, te genuai menio, usu egobeo,’ augwaligo te homu yai.

⁴⁴Te Jisasgo i weyu, te po wai, “Bidigo homu enaba mubo bidi, agai enabolo naga homu mubeo. Te bidi agai homu te ena tagala palali bidibolo me muani.

⁴⁵Tama niwai bidigo aga gedugo ena suali bidi, agai te ena tagala palali bidi me subo.

⁴⁶Ena e tǫba asali, te ula tiwai dao. Magi basowe? Tigidali bidi enabolo homu muani bidi augwali te hulide bididali weyu, ena te tǫde ula tiwai asai dao.