San Juan 12:34-46

³⁴Ta ñáyɨvɨ nacaha̱n ñu ta catyí ñu chi ra: ―Tuhvá ndi chiñi ndi sacuaha ra nu libru ley yo vatyi ra cuví Cristo tyicuan ri maa cucoo ra. ¿Yoso caa cha catyí yoho tyi cusandaa ñu chi Rayɨɨ quichi nya gloria nu cruzi? ¿Yóó ra cuví Rayɨɨ cha quichi nya gloria cha cahún tuhun? ―catyí ñu, ndacá tuhun ñu chi ra.

³⁵Tyicuan ta ra Jesús catyí ra chi ñu: ―Iyó cha ndichin nu nyicu ndo, soco suhva ri ca quɨvɨ. Ca̱ca ndo ityi nu ndichin cha ni ri ca cha ndichin. Coto sana ri iñi ndo ta nduñaa iñi, vatyi ñu chicá noo nu ñaa iñi ña chitó ñu nya ityi cuahan ñu.

³⁶Chi̱no iñi ndo chi yuhu ra cuví ñuhu ndichin cuan, cha nɨ ri ca cha nyaá que chihin ndo. Tyicuan ta cuví ndo ñáyɨvɨ iyó nu ndichin. Cha yaha̱ catyi̱ ra Jesús tuhun ihya tixehe̱ nuu ra chi ñu.

³⁷Vasɨ cuaha xaan milagru sacuvi̱ ra Jesús nuu ñu soco ña chinó iñi ñu chi ra.

³⁸Vatyi tahán chi cha cuví tari catyi̱ ra Isaías profeta Nyoo, nu caha̱n ra tyehe caa: Sutu Mañi yuhu, yori cuñí chino iñi tuhun cahán ndi. Yori cutuñí iñi tunyee iñi iyó chuun, Sutu Mañi yuhu, catyi̱ ra Isaías ta cha naha.

³⁹Ta cha cuenda tuhun ihya cha nyaá nu tutu, yucuan chaha vatyi ña cuví chino iñi ñu vatyi suri tyaa̱ tucu ra Isaías tyehe caa:

⁴⁰Nyoo sanducuaa̱ ra chi ñu. Ta sandundava̱ ra añima ñu, tacuhva cha ma nyehe ñu chihin chɨtɨ nuu ñu, ta ma cutuñi iñi añima ñu, ta ni ma nacuhva cuenda ñu chi ñu chi ra tacuhva sanduvaha ra chi ñu.

⁴¹Ra Isaías catyi̱ ra tyehe caa vatyi nyehe̱ ra nu nyacá ñaha Sutu Mañi yo Jesús ta caha̱n ra tuhun ra.

⁴²Soco cuaha ñu Israel chinó iñi chi ra Jesús, ta nyacua nya suhva ra cacuví nuu, soco ña saquetuví ra nuu ñáyɨvɨ vatyi yuhví ra chi ra cacuví fariseo coto tava ñehe ra chi ra vehe ñuhu.

⁴³Vatyi cuñí ca ra cuvaha ra nuu ñáyɨvɨ ta ñima ca cha cuvaha ra nuu Nyoo.

⁴⁴Ñihi cahán ra Jesús, ta catyí ra: ―Ñu chinó iñi chii, ñima chi maa ri mai chinó iñi ñu, soco chinó tucu iñi ñu chi ra cha tachi̱ chii.

⁴⁵Ta ñu nyehé chii, nyehé tucu ñu chi ra cha tachi̱ chii.

⁴⁶Yuhu cha cuví tari noo cha ndichin vachi ñuhu ñayɨvɨ̱ ihya, vatyi tacuhva vatyi ñu chinó iñi chii ma ndoo ñu nu ñaa iñi.