John 12:34-46

³⁴Digau dogologo ga helekai, “Madau haganoho e hagi mai bolo di Mesaia le e mouli gaa hana hua beelaa. E hai behee, goe dela e helekai bolo Tama Tangada le e daudau gi nua? Tama Tangada deenei la koai?”

³⁵Jesus ga helekai gi digaula, “Di maalama la gaa noho i godou baahi i di madagoaa dulii. Llooadu hua beelaa i di godou ala, i di madagoaa goodou e hai mee gi di maalama, gi deemee di hanadu di bouli gi goodou. Tangada dela e heehee i lodo di bouli, le e de gidee dono gowaa e hana ginai.

³⁶Hagadonu ina di maalama i di madagoaa goodou e hai mee gi di maa, gii hai goodou nia daangada ni di maalama.” Muli Jesus ne helekai, gei Mee gaa hana hagammuni gi daha mo digaula.

³⁷Ma e aha Mee ne hai ana mogobuna haga goboina huogodoo aanei i mua nadau golomada, gei digaula hagalee hagadonu a Mee,

³⁸bolo gi kila ai nia helekai soukohp Isaiah boloo, “Meenei Tagi, ma koai dela e hagadonu tadau mee ala gu haga modongoohia? God ne haga modongoohia ana mogobuna la gi di ai?”

³⁹Deenei tadinga di nadau tee hagadonu, idimaa, Isaiah gu helekai labelaa boloo,

⁴⁰“God la gu haga bouli nia golomada digaula, ge guu tai nadau hagabaubau, bolo nadau golomada gi de gidee, gei nadau hagabaubau gi de modongoohia, gei digaula ga hagalee huli mai gi di Au, bolo gei Au ga hagahili digaula. Aanei nia helekai a God.”

⁴¹Isaiah ne helekai beenei, idimaa, mee gu gidee di madamada o Jesus, mee e helekai i Mee.

⁴²Gei deeai, dogologowaahee nia dagi o digau o Jew ne hagadonu a Jesus, gei digaula hagalee haga modongoohia aga nadau hagadonu, idimaa, digaula e mmaadagu i nia Pharisee gi dee kili ginaadou gi daha mo synagogee.

⁴³Digaula gu hiihai e haga gila aga nia hiihai o nia daangada, laa hongo di hiihai o God.

⁴⁴Jesus ga helekai dono lee gi nua, “Be koai hua dela e hagadonu Au, geia ne hagadonu labelaa a Mee dela ne hagau mai Au.

⁴⁵Be koai hua e gidee ia Au, e gidee labelaa a Mee dela ne hagau mai Au.

⁴⁶Au go di maalama ne hanimoi gi henuailala, bolo digau ala e hagadonu Au, ga hagalee noho i lodo di bouli.