San Juan 12:34-46

³⁴Awaruzne sɨnkaara: —Moisés parɨt aizpa akwa, aune Dios narɨtmika mizurainkas imanazi pianmakpas. Sunkana nune chiyuras Ampu kurishta patpiannazi kiznaru. ¿Chikishma sun kiztus? ¿An chiyuras Ampune mɨnma i?

³⁵Katmizna Jesúsne kaiznara: —Nane kai malnintumikane ish. Nakas awaruza na kamtamtu aizpa piankamninmika ish. Nane ukasa akkwan payukimain uzmanash. Na kaizta aizpa mɨrain, piankamanapa, nil uzanapa. Na kaizta aizpa piankamtachiruzne tɨlta chamturuzkana mai. Uspane wan kaarɨnazi.

³⁶Na ukasa uzasmin, na kaizta aizpa nɨjkultain. An pit uruza kiwainnanazi, nil uzanapa, kaiwara chaanapa. Sun kiznarawane, Jesúsne ɨt kit awaruztas kularɨt, ussa wanmalamanpa.

³⁷Jesús akkwan iztasparɨt kal usparuzpa izarakin kirɨtkas, uspane ussa nɨjkulashitchi.

³⁸Sunkana uspane Isaías, Diospa kainammika, parɨt aizpa kiarɨt. Ka parɨt: “Anpat, uspane au kaiznarɨt aizpa mɨara. Uspa Dios iztasparɨt kal izarakas, uspane nɨjkularachi.”

³⁹Uspane nɨjkularachi, Isaíaskas an kaiz kit ka para akwa:

⁴⁰“Diosne usparuza kasu izsachimikakana namninnara, izamanpa. Usne usparuza nilchi mininnara, wat piankamanapa. Wat piankamtuchi akwa, uspane nawa kaiyasachi, na usparuza sɨnam saninnana. Katmizna nane usparuza kakulninasachish.”

⁴¹Isaíasne sun pit kaiznara, Jesús ussa izpan kit paiña iztakin anza katsa namta. Katmizna usne Jesúspa parɨt.

⁴²Sun pit nɨjkularachiruzpa parɨtkas, akkwan Judío awaruza ɨnintuzne Jesústa nɨjkulara. Fariseo awaruz ishkuamtu akwa, uspane nɨjkulara aizpa wan awaruza kwinta kinarachi, Fariseo awa usparuza kammu yaltas ɨninnamanpa.

⁴³Uspane awa uspawa minñara aizpa ishkuara. Sunkana uspane Dios uspawa mintu aizpa izkiamtuchi.

⁴⁴Jesúsne paiña pitkasa tɨnta kaiznara: “Nawa nɨjkultumikane, nawainchi nɨjkultu. Uskas nawa ɨnintumikashakas nɨjkultu.

⁴⁵Nawa iztamikane nawa ɨnintumikashakas iztu.

⁴⁶Nane impilkanain ish. Nane awaruza na kamtamtu aizpa piankamninmika ish. Nane an sura arau, nawa nɨjkulturuz kwail kiamanpa, Diosta pianchiruzkanain tɨlkwilta chamturuzkanain uzamanpa.