Huwan 12:34-46

³⁴Ne migtabak kandin ka me etew, “Sumale te Balaud ta, kene egpatey ka Kristu. Ne mania te migkahi ka te ka Anak te Etew keilangan ne egkayawen? Hentew bes seini se Anak te Etew?”

³⁵Ne migtabak si Hisus, “Kene naan de egkaluhey ka malayag ne egpakigduma kaniyu. Purisu, hipanew kew taheed te malayag pad eyew kene kew egkeyingumaan te marusilem. Su ka eggipanew te marusilem, kene egpakanengneng ke hendei sikandin egpabulus.

³⁶Purisu palintutuuwa niyu wey salihi niyu ka malayag taheed te duen pad seini te kaniyu, eyew egkeyimu kew ne keet-etawan te kalayag.” Te pegkapenga rin dutu te miglalag, miggipanew e sikandin wey miggeles kandan.

³⁷Minsan masalig e ka me kein-inuwan ne neyimu rin diye te tangkaan dan, piru ware pad iya man-e sikandan migpalintutuu wey migsalig kandin.

³⁸Seini ka migpamalehet te ingkahi ni prupita Isayas ne eggenendue: “Magbebaye ne Manama, hentew buwad iya ka migpalintutuu te guhuren ney? Ne hentew buwad iya ka mig-ila te karesen ne impapitew nu?”

³⁹Sikan naa iya ka ware sikandan migpalintutuu su migkahi pad si Isayas:

⁴⁰“Imbutud sikandan te Manama, wey impakehal rin ka me ulu ran, su kema ke egpakakita sikandan wey egpakasabut, wey eglibed e sikandin kandan eyew egpabawi.”

⁴¹Inlalag seeye ni prupita Isayas su nakita rin ka karesen ni Hisus wey migpangguhud sikandin meyitenged kandin.

⁴²Ne minsan pad due, masalig ka me pangulu te me Hudiyu ne migpalintutuu wey migsalig ki Hisus. Piru tenged te me Parisiyu, ware sikandan migpeila eyew kene dan egpaaween diye te simbaan te me Hudiyu.

⁴³Su iyan dan in-awes ka pegdayan te me etew, du te pegdayan te Manama.

⁴⁴Nataman, migbalbalukan si Hisus ka miglalag ne eggenendue, “Ka egpalintutuu wey egsalig keddiey, kene de ne sikeddi ka egpalintutuuwan wey egsalihan din, ke kene, minsan degma ka migsuhu keddiey.

⁴⁵Ka nakakita keddi, nakakita degma te migsuhu keddi.

⁴⁶Miggendini a kayi te ampew te tane isip kalayag, su eyew minsan hentew ne egpalintutuu wey egsalig keddi, kene egkahaat diye te marusilem.