Jon 12:34-46

³⁴Ma gur na fanu ae ri ka kiliis u le, “Kemem ka ongen ta u na Nagogon le Mesaia in kiis fitliu, ke arafah bin o ka tara le, Kalalik ken Kaltu rin fafen ta u tom? Seh tom, i e Kalalik ken Kaltu igii?”

³⁵Ke Iesu ka fas ri aragii, “Gamen kep u e malal ae fatuklin aunbiing sau. Gam la, aunbiing i mel biitom e malal isi kubunor gong i afit gam. Ma kaltu ae i la na kubunor, biil i usum na falifuh i la ulo.

³⁶Luun unune kimi na malal na aunbiing gam kep u, isi gamen tapiek arae foron kalalik tina malal.” Aunbiing ka farfarop na orek, Iesu ka la ma ka mumun lo ri.

³⁷Taftawa le, Iesu ka tel ta ifuun e rakrakai na fakileng tah na matri, isau le biil tom ri unune lo.

³⁸Foron tier igii una fatekentu orek ae poropet Aisaia i siit ta u le, “Kumguui, biil tikas i unune biitom na orek kimem, ke biil tikas i kep ti malal biitom na rakrakai kiam.”

³⁹Pesu, biil i fasih rin unune, wara le poropet Aisaia i use u sabin le,

⁴⁰“God ka fakut ta matri, ke ka fasorokai ta balri, isi biil i fasih rin par failiim ini matri, le biil rin ililiim ini balri, isi rik fis usuf iau ma iak faliu pes ri.”

⁴¹Aisaia i use ta u igii, wara le ka par ta memeh ke Iesu, ke ka ororek lo Iesu.

⁴²I tekentu le, i fuun lon foron famfamu sabin ri ka unune tah lo Iesu. Isau le ri soke foron Farasi ke biil ri fapos unune kiri, tara ma ri ka ti kale ri isi gong ri lotu na felun lotu.

⁴³Wara le ri ier kanaka tom isi fanu rin usefages ri, ma biil ri ier kanaka isi ususefages tinbae sing God.

⁴⁴Ke Iesu ka perek ma ka tara aragii, “Aunbiing neng e kaltu i unune lo iau, biil i unune sau lo iau. Isau le i unune sabin lo ier ae i wuun ta iau uga.

⁴⁵Aunbiing i par iau, i par ier sabin ae i wuun ta iau uga.

⁴⁶Ia la tah uga na piklinbat arae malal, isi fanu tikii ae ri unune lo iau biil rin kiis kiniis na kubunor.